Rauthla 11.August,2021: Nimin khan Lok Sabhaah Constitution siamthat vawi 127-na 127th Constiitution (Amendment) Bill 2021 chu lungrual taka pass a ni a, Member hmun thuma thena hmun hnih leh inkhawm laia member awm hmun thuma thena hmun hnih aia tamin an thlawpnaa pass a ni.
Vote lak a ni a, member 385 chuan a thlawp lamah an vote a, thlawp lo lamah vote a awm lo. Constitution siamthatnaah chuan state leh Union territory-te chu anmahni Other Backward Classes (OBC) List siam tura thuneihna pek a ni.
Bill sawihonate chhangin Social Justice and Empowerment Minister Dr Virendra Kumar chuan bill chuan state-te hnenah anmahni state chhunga hnam hnufual (other backward classes) list siam turin thuneihna a pe ang a, chu chuan ram chhunga sawrkar inkaikhaichhawn diat (federal structure) a tichak sawt dawn a ni a ti. Minister chuan hnam hnufualte hamthatna pek chu sawrkar insakhi thingchunglawnnaa ni a ti a. Dan siamthatna chuan hnam hnudualte hmakhua a humhimsak dawn a ni a ti. Memberten an ngaimawh an sawite chhangin Minister chuan Supreme Court chuan reservation chin a bituk chu 50% a ni a ti a. Mahse, hei hi la sawiho theih a ni a ti. He bill pass a nih hian Maratha hnamte tana reservation pawh a hma tel nghal a ni a ti.
Sawihona tanin Congress hruaitu Adhir Ranjan Chowdhury chuan OBC te hmakhua a nih angin bill chu eptute pawhin an thlawp a ni a ti a. Mahse, bill chu sawrkarin Uttar Pradesh leh Uttarakhand Assembly inthlan melh rana a siam a ni a ti. Congress chu OBC-te changkanna tura hma laknaah a hmatawngah a awm reng thin a ti a. Pegasus chungchang sawiin engatinge sawrkarin ram dangte anga chhui chhuah hna a tan ve mai loh ni? a ti a. State tam takin reservation chungchanga bithliah chin (ceiling) awm chu tihpun an duh a ni a ti. Entirnan Tamil Nadu a sawi chhuak a, Reservation chu hnam hnufual zawkte chawikanna atana hma lakna dik a ni a ti.
Post a Comment