Lawngtlai August 25, 2021 : Nimin August 24, 2021 khan Lai District Congress Committee hotute chuan CEM, LADC Pu Manghmunga Chinzah chu a office lengin an kawm. CEM kawmnaah hian Lai DCC hruaitute Pu H. Rochungnunga, Pu C. Muanthanga MDC, Pu Laltlawmlova Chinzah Ex. EM leh Pu C. Kapkima GS te an tel.



Lai DCC aiawhin Pu H. Rochungnunga Treasurer Lai DCC chuan Covid-19 dona kawnga CEM leh a kaihhruai sorkarin hma a lak dan leh Medical Department te nena theihtawp chhuaha kan ram leh hnam tana hri dona kawnga an thawkho leh hma nasa taka a la chu lawmawm a tiin ram mipui tan thil hlu tak a ni a ti a. He hri dona kawngah hian opposition party niin tih theih tam nei lo mahse, CEM hmalakna hi an thlawp a ni tih sawiin, hmalak chhunzawm zelna atan CEM Relief Fund ah Rs.7000/- Lai DCC chuan pek țhaa a hriat a vangin CEM hnenah hian a hlan nghal a ni. 


Hemi hnu hian Pu Laltlawmlova Chinzah Ex. EM chuan 125th Constitution Amendment lo awm tur chungchang sawiin, Congress Party chuan kan hotu hmasate kawng lo zawh tawh District Council in thu neihna lian zawk leh sum tam zawk kan hmuh ve theihna tura hma lak zel hi țha a ti a. He thil lo awm turah pawh hian Central Sorkarin Mizoram sorkar hotute 125th Constitution Amendment tur chungchangah an ngaih dan a rawn zawh hlawm a vangin Mizoram leh LADC ah MNF sorkarna ve ve a nih bawk a. Lai ram leh hnam Pa, kan aiawh a nihna a vangin leh Mizoram sorkarin Central lama Comment a pek hma ngei hian  Chief Minister Pu Zoramthanga hnenah D.O Letter ziaka; Lai fate  tana a pawimawhna leh, state danga kan Council puite dinhmun ang kan din ve theihna tur leh, thu neihna lian zawk pek kan nih ve ngei theihna tura ngen turin leh a mah ngei a kal thei lo a nih pawhin a aiawh tal tir turin Lai DCC chuan a ngen a ni a ti a. Tun hi District Council te tana hun pawimawh a nih a vangin theih ang tawpa Aizawl lama MNF Ministry ah pawh, ram leh hnam tana țang ngam turin Lai DCC chuan kan CEM hi a ngen bawk a ni.

Post a Comment

Powered by Blogger.