RAMRI HUMHALHNA KAWNGAH TANRUAL A NGAI - MPCC
Mizoram leh Assam ramri buaina kan hmachhawn mekah Mizoram mipui kan tanrual a ngai hle a. Sorkar tha ti chak turin theihtawp kan chhuah a ngai a ni.
Ramri buai reng reng hi awlsam taka chinfel mai theih a ni lo a, state pahnih lungrualna a ngaih miau avang leh, state pahnihte ngaihdan a inan theih bawk si loh avangin thil buaithlak tak a ni. Hetiang karah hian hun kal tawhah Congress sorkar laite, MNF leh PC sorkar laite pawhin ramri avanga buaina hi a lo thleng fo tawh a. Chief Minister level a inbiakna te, Chief Secretary level a inbiaknate pawh a lo awm tawh thin; mahse, ramri chin ni a kan hriat a inan loh miau avangin he buaina hi chinfel mai theih a la ni lo a ni.
Sorkar hun kal tawh zawng zawngah khan Assam hian Mizote luah chin ram a rawn nek fo a, amaherawhchu, Mizoram hi a tawlh ngai lo a, mi nawlpui hriat lem loh hian kan luah chin ram kan zauh hret hret zawk thin a ni. Tunhnu a Assam lamin Mizote huan thlai an rawn tihchhiat zawng zawngte hi sorkar hmasa lam atang tawha Mizote luah chin ram vek a ni tih tunhnaia kan boruak hian a tichiang hle a ni.
Tunhnaiah Assam hian nasa takin ramriah min nek leh ta a, tunhma zawng aiin min zuam ta niin a lang. Mizote luah chin, huan thlai kan neihna ram ngei engemawzat hun reilote chhunga Assam lamin min chhuhsak ta mai hi Congress Party chuan hriatthiam harsa a ti a. Heng kan ram luah thin, tunhnaia Assam laka kan hloh takte hi laklet leh an nih theih nan Mizoram sorkar hian na takin hma la sela, Mizoram police-te pawh nasa takin thuam tha rawh se. Tin, ramri humhalhna kawnga sorkar tha ti chak turin Mizorama political party zawng zawngte, NGO-te leh Mizoram mipuite i tangrual tlat ang u.
Sd/-
C. LALHRIATPUIA
Secretary
MPCC Media Department
--------------------------
MPCC/Media/PR-2021/42
Dated Aizawl July ni 20, 2021
Post a Comment