Lawngtlai 29.07.2021 : Nimina Barak Valley Democratic Frontin an koh, politics pawlte chung zingah chuan eptu AIUDF-in an thlawp, state ramri-a Mizoram nena intihbuainaa mi paruk an thih avanga lungawi loh lantir nana darkar 12 chhung bandh-ah chuan nunphung pangngai a khaihlak a. Ei zawnna hmun zawng zawngte khar a ni a, Mizoram dep Cachar, Hailakandi leh Karimganj district-a lamlianahte chuan lirthei tlan a tlem hle.
Barak Valley bandh chuan emergency service-te chu ngaihhnathiam an ni a, rel tlan erawh chu a nghawng lo. Thil thleng duhawm lo a awm lo va, bandh kotu BDF President Pradip Dutta Ray chuan bandh chu mipuiin an thlawp tha hle a ni a ti. Bandh ko lo thei lo an nihna chhan sawiin, “Kan police-te an thi a, thisen dang a chhuah tawh loh nan, ramri chinfelna nghet a awm tur a ni” a ti.
Hailakandi district-ah chuan Mizoram lama kal tur lirtheite chu pawl hrang hrangin an dang a, tiamchin awm lovin economic blockade an puang a, bungraw phur truck Mizorama kal turte dan nan a ni. Hmun hrang hrangah mi pasarihte thah duh loh lantirna neih a ni.
Post a Comment