Czech Rep hian R/16 ah rinkai zawk Netherland goal 2 faia hnehin a vawi- 8na atan q/final a lut a. Denmark pawhin Euro 2016 semi finalist Wales goal 4 faia hnehin q/final a lut bawk a. Czech Rep leh Denmark te vawi 11 an intawn tawh ah an inhneh tawk hle a, Czech Rep vawi 3 chakin Denmark vawi 2 an chak ve thung a, vawi 6 chu chak zawk awm lovin an in hneh a ni. An intawn hnuhnun ber 15.11.2016 a friendly match ah chak zawk awm lovin 1-1 in hneh a ni.
Czech Rep hi Euro ah a mikhual lovin 1976 ah champion, 1996 ah runners up, 1960, 1980, 2004, semi final, 2012 ah q/final a thleng a. Denmark pawh an mikhual lutuk bik lo va 1992 ah champion nomawi chawiin, 1964, 1984 ah semi final, 2004 q/final ah Czech lakah 3-0 in tlawm a, zanin ah hi chuan tlawm a tum tawh lo hle a ni. Team hnihte hi an thiamna piah lamah tharum ngah dun tak an ni a, chu chuan an khel a ti hmuh zual khawp ang.
Match 4 an khelh tawhah Czech Rep hian goal 5 ti lutin goal 2 chiah an chhuah a, Denmark hian goal 9 thun tawhin goal 4 an chhuah ve thung a. Hei hian Czech Rep defence a phui that zia a pholangin thei awm e. Denmark lam hi an ball nawr a nain, match tin ah goal 2 tilut zel ang an ni a, an hmatawng hoten hna an tlin hle a, Czech Rep defence Vladimir Coufal (West Ham) te, Ondrej Celustka te, Jan Boril (S.Praha ve ve) leh Tomas Kalas (Bristol City) te tan an tan khawng deuh chu a ngai ngei ang.
Czech Rep lamah an player pawimawh left back Jan Boril chu suspend vangin a inlan thei dawn lova, a hmunah Pavel Kaderabek (Hoffenheim) a din hmel. Denmark lamah inhliam Yussup Poulsen (Leipzig) leh Daniel Wass (Valencia) te an dam fel tawh a, Mikkel Damsgaar (Sampdoria) pui thei tura beisei an ni a, malpui hliam Captain Simons Kjaer (AC Milan) pawh Andreas Christiansen (Chelsea) te thlawp thei tur a ngaih a ni bawk. Denmark lamah a hmatawng Martin Braithwaite (Barcelona) leh Wales lama goal 2 thuntu Kasper Dolberg (Nice) te chuan an hmun ngai luah lum leh tur a beisei an ni.
Denmark ho ven ngun ngai ber tur chu Bayern Leverkusen striker kum 25 a upa Patrik Schick a ni, Schick hian tharum a ngahin, a che rang a, match 4 ah goal 4 thun tawhin, top scorer ni mek Ronaldo (5 goal) lehpel a Golden Boot dawn ngei a tum a ni, thei tak maw ?
-Biakthansanga Khiangte-
Post a Comment