Lawngtlai, July 16, 2021 : Vawiin khan Pu Sailiana Sailo, Chief Managing Officer, Northest Consultancy Service chuan Deputy Commissioner, Lawngtlai hnenah Covid Care Centre dang dap turin a ngen.
Thingkah hmuna Covid Care Centre atan hman mek hi NEC sak a ni a, vawiina DC, Lawngtlai hnena lehkha an pekah chuan Building te hi la sak zawh chiah loh a ni a, hri leng avangin kan dinhmunte hrethiamin CCC atan hman an phal thu an sawi a, hetih lai hian an bill-in a tuar thu leh tunhnaia building chhunga tui tlem leak avanga an firm social media a sawichhiat a nih chu na an tih thu sawiin, CCC avang hian an hna pawh a chak loh phah thu an sawi a, hetianga thudik lo hmanga social media a sawichhiat an ni chu pawi an tih thu an sawi bawk.
Hemi a nih avang hian NEC chuan DC, Lawngtlai hnenah 3rd IR Bn. Hqrs. an sak mek chu an hna an chhunzawm theihna turin CCC atan hmun dan dap turin an ngen a ni.
Hemi chungchangah hian Dr. Andrew H. Vanlaldika, DC, Lawngtlai chuan NEC lehkha hi a hmuh thu leh harsatna an sawi te hi a hriatthiam pui thu a sawi a. Thingkaha 3rd IR Bn. Hqrs, Building te hi la sak zawh loh a ni a, kan mamawh em avanga zo lo chung chunga CCC atan a hman a ni a, building-ah harsatna a awm hi a awm reng a ni a ti a. CCC ah hian mahni ina anga nuam taka awm theih a ni lova, thawktute leh damlo awm te pawn he harsatna hi hrethiam turin DC chuan a chah bawk.
DC, Lawngtlai chuan NEC ten harsatna an sawi hi a theih chin chinah chinfel zel tum a ni a ti a, tun dinhmunah chuan hmun dangah Covid Care Centre-a hman tur tha a awm loh avangin hmun dangah in sawn tumna a awm rih loh thu a sawi bawk.
Post a Comment