International football tournament upa ber 1916 atanga khelh tan Copa America 2021 chuan a vawr tawp a thleng chho mek a, naktuk, July 11. zing dar 5:30 ah a puanzar khar a ni ang. Final hi football a  chung nung zawk inchuh vanga inhmelma hlun Argentina leh Brazil ten 2014 WC final khelhna seat 78,838 awmna Maracana Stadium, Brazil ah an khel ang. 1950 WC final Brazil leh Uruguay ten Maracana an khelh in a hmunah entu 199,854 an awm a ni!.

 

Copa America 2021 hi a tirah chuan Argentina leh Colombia thlen tura ruahman a ni a, mahse Argentina ah Covid 19 a hluar tak em avangin thleng chi niin an hre lo va. Colombia pawh tualchhung buaina avangin a rem lo leh a, chawpchilh ang reng takin Brazil in vawi 8na tan a thleng leh ta a, khawpui pali ah khelh a ni. Copa America ah hian an inchuh ber chu Nomawi kg 9 lai a rit, inches 30 a sang a ni. 


Copa America ah hian CONMEBOL ram 10 bakah ram pahnih an sawm ve thin a, Copa America 2021 ah pawh hian S.America pawn lam atangin Qatar leh Australia an sawm a. Mahse Covid hripui vangin chawpchilh takin an inhnuk dawk  ve ve a, S.America ram 10 in an khel ta a. Ram 10 te chu Group A leh Group B ah inthenin an inkhel kual a, Group khat atangin a sang sang 4 in quarter final lutin, chuta tang chuan knock out a khelh a ni. 


Mak tak maiin q/final, s/final leh 3rd place match ah te hun pangngaia an inhneh pawhin, extra khel lovin penalty pet tir an ni a, final ah erawh hun pangngaia an inhneh chuan extra an khel ang a, an la inheh fo chuan penalty hmangin a chak zawk zawn a ni ang.


Argentina hian Q/final ah Ecuador 3-0 a hnehin S/final ah Colombia penalty ah 3-2 a hnehin a vawi 15na atan final a lut a. Champion lai Brazil pawhin Q/final ah Chile 1-0 a hnehin, S/final ah Peru 1-0 bawk a, hnehin a vawi 10na atan final a lut bawk a ni. 

Argentina leh Brazil te vawi 108 an inhmachhawn tawh ah Argentina vawi 39 chakin, Brazil vawi 43 a chak thung a, vawi 26 chu chak zawk awm lovin an inhneh a ni. Copa America  bik ah chuan an pahnih inkhel ah Argentina vawi 15 chakin, Brazil vawi 10 a chak ve thung a ni. Tun hi Copa America a final a an intawn vawi 4na tur a ni a, 1937 final ah Argentina 2-0, in a chak a, 2004 final ah hun pangngai ah 2-2 a indraw in penalty ah Brazil 4-2 in a chak a, 2007 final ah Brazil 3-0 in an chak a ni.


Brazil hmachhawn turin Argentina Coach hian 4-3-3 formation a hman hmel a, 1st eleven tur a rin te :- Emiliano Martinez (Fiorentina), Nahuel Molina (Udinese)   Pezzilla (Fiorentina) Nicolas Olamendi (Benefica) Seville left wing  Marcus Acuna te, Rodrigo de Paul (Udinesse) te Lwardro Peredes (PSG) Giovani lo Celso (Tottenham)  Lionel Messsi, Intermilan striker goal 3 thun tawh Lautaro Martinez te goal 2 thun tawh Alejandro Dario Gomez (Seville) 


 Argentina lamah Man-Utd in season thar atan euro maktaduai 60 a an dawr Atalanta back Cristian Romero chu a hliam a dam chian loh avangin a khel theih loh hmel a, a bak inhliam leh suspend an awm lo.


Brazil hian 4-2-3-1 formation an hman hmel a, 1st eleven tur a beisei te:-  Ederson Moraes,(Man-City) Danilo (Juventus), Eder Mititao (Real Madrid), Marquinhos (PSG), Atletico Madrid left back Renan Lodi te, Real Madrid defensive midfielder Carlos Casemiro te,  Fred (Man-Utd), Roberto Firmo (Liverpool), Lyon striker goal 2 thun tawh Lucas Paqueta te, goal 2 tilut tawh Neymar (PSG) te, Everton striker Richarlison.


Brazil lamah  Juventus left back Alex Sandro chu a hliam a dam chian loh avangin final khel thei lo tur a ngaih a ni a. Quarter final a red card hmanga sent off Man-City forward Gabriel Jesus pawh match hnih khel thei lo tur a hrem a nih avangin Sunday dress in a thiante inkhel a lo thlir mai a ngai dawn a ni.


Tukin zing khan S/final a chak zo ta lo Colombia leh Peru ten 3na inchuha khelhin Colombia 3-2 a chakin 3na a ni. Ti hian match 27 khelh tawh ah goal 64 a lut tawh a, Lionel Messi leh Luis Diaz Colombia te chuan goal 4 ve ve ti lutin top scorer an ni mek a, Messi hian Golden Booth dawng turin chance a nei tha hle a ni.


- biakthansanga khiangte

Post a Comment

Powered by Blogger.