Lawngtlai 09 July, 2021 : Mizoram Baptist Kohhran, Administrative Committee chuan Mizoramah Covid hrileng a hluar zel avang leh hemi atana enkawlna Covid Care Centre te indaihlohna a san chhoh zel avangin Mipuite harsatna leh manganna te chhawk zangkhai a nih theih nan Covid Hospital din thuai ni se tiin a rel.
Hemi chungchanga tul ang zel a ruahmanna te siam tur leh hma lo la turin Sub. Committee din nghalin, Chairmana-ah Rev. R. Lalbiakliana, AGS(Service), Secretary-ah Upa Dr. Lalramzauva, Director, Medical & Health Department te ruat an ni a. Sub.Committee Member dang pali atan –
Rev. F. Ramdinmawia, General Secretary,
Rev. Dr. C. Vanlaldika, AGS (Mission),
Er. Victor Lalrinawma Sailo, Director, Property Department leh Dr. B. Lalrinzauvi, Medical Superintendent te ruat an ni bawk.
Tin, Christian Hospital, Lawngtlai tan Oxygen Generator lei tum mek a ni a. A leina tur sum hi Asia Baptist Federation (APBF) atangin APB-Aid cheng nuai 14 dawn tur-ah tunah hian 50% hmuh tawh niin a bak 50% pawh hi hmuh thuai beisei a ni. Khawl phurhna man leh hmun hma buatsaihna te hi BCM-in a tum thung dawn a ni. Tunah hian he Oxygen khawl bunna tura thil tul leh pawimawh tihfel ngai te buaipui mek a ni bawk.
Hetihlai hian, tunkar Thawhlehni, Christian Hospital, Lawngtlai-ah covid positive an lo awm palh avangin sorkar SOP angin hospital khar lailawk a ni a, tih thianghlim mek a ni. Chawlhlehkar lamah hospital hi a pangngaia kal leh theih beisei a ni.
Post a Comment