Zanin zet chu inkhelh hmuhnawm vek dawn a, Khasi em ang maiin 12:30 thlengin a arh chho luih dawn a ni.
Sweden vs Slovakia 6:30 Pm: Sweden leh Slovakia inkhel tur hi a pawimawh hle. Sweden hian match hmasa berah Spain goal awmlova a drawin point khat a khawl ve tawh a, play off atanga Euro khel ve thei Slovakia hi chuan Poland 2-1 in an hneh thung a. Slovakia tan zanin a an chak chuan last 16 an hnaih kuar dawn a, Sweden tan lah an chak lo a nih chuan an tla ruai a nih dawn avangin chak ngei a tum ruh hle.
Slovakia coach hian senior player Vladimir Weiss, Peter Pekarek, Juraj Kucka, Dusan Kuciak leh an Captain Marek Hamsik tih loh chu kum naupang lam a chhawr thung a, a ti fuh phian a ni.
Sweden hi Slovakia lakah a chungnungin, vawi 6 an in tawn tawhah vawi 3 chakin vawi 3 an in draw a. An in tawn hnuhnun ber kum 2017 a friendly match ah Sweden leh Spain inkhelh a, Spain goal post pet per a Spain tan tute thin tiphu dualtu Alexander Isak chuan Slovakia lamah a pet goal a ni.
Sweden hi an match hnai vai 5 ah an chak vek laiin, Slovakia hi chu match 5 ah vawi hnih chian an chak thung a ni. Sweden hi defence ah an khauhin, Spain khan nawr bet hle mahse, Man-Utd defender feet 6’2 a sang Victor Lindelop te ho hi an patlang thei tlat lo. Kha vang te pawh kha a niang Lindelop chu Man of the Match ah an thlang hial a ni.
Sweden 1st eleven tura beisei te: Olsen, Lustig, Lindelop, Danielson, Augustinsson, S.Larson, Ekdal, Olsson, Forrberg, Alexander Isak, Marcus Berg. Slovakia 1st eleven tura beiseite: Dubraka, Pekarik, Satka, Skriniar, Hubocan, Kucka, Benes, Haraslin, Hamsik, Mak, Duda. St Peterburh khawpuia Krestovsky Stadium ah an khel dawn a, referee Daniel Siebert, German a ni ang.
Croatia vs Czech Rep 9:30 Pm: 2018 WC a runners up Croatia hi an match hmasa berah England lakah a chesual a, zanin hi chuan chetsual nawn a tum tawh lo hle. Kum 1976 kum a Champion Czech Rep hian an tawnhriat an chhawr tangkaia, Scotland lakah point 3 an hlawh chhuak thung a. Croatia tan zanin ah an chaklo leh a nih chuan puanthuah tel a hnaih thuak dawn avangin siruk lain an nawr dawn a.
Czech Rep tan lah champion tura rinkai England hmachhawn tur an la nih avangin chetsual a awm thei a ni a, zanin ah hian point thum hlawh chhuah ngei an tum ruh hle bawk a. Chak tumve ve innuai tur an ni a, an inkhel tur hi engti zawng pawhin a nep thei lo hrim hrim a ni.
Croatia lamah England nen an khelh a inhliam Ranger left back Borna Barisic chu a chawlh rih hmel a, hliam te nau nei an Captain Luka Modric erawh a inlan thei tura ngaih a ni. Real Madrid midfielder Matic Kovacic chu Marcelo Brozovic in a thlak a rinawm a, England nen an inkhelh a a hma tawng pathum Bruno Pelkovic, Nikola Vlasic leh Josip Brikalo te chu a ngaia an din a rinawm.
Czech Rep lamah Scotland nen an khelh a inhliam an GK J. Pavlenko chu Tomas Kaubis an a thlak ang, a ni bakah hi chu player inhliam langsar an awm awm lo ve. In intawn tawh dan atanga teh chuan Croatia lakah hian Czech Rep hi a chung nung zawk hle a, vawi 3 an in tawn tawhah Czech Rep hian chakloh an la neilo, an intawn hnuhnun ber Euro 2016 ah khan 2-2 in an in hneh tawk a ni.
Croatia 1st eleven tura rin te – Livakovic, Vrsalijko, Vida, Caleta – Car, Gvardiol, Modric, Kovacic, Brekalo, Vlasic, Perisic, Petkovic. Czech Rep : hian formation a hman a rinawm, 1st eleven tur a beisei te :- Vaclik, Coufal, Kalas, Celustka, Boril, Soucek, Kral, Masoput, Darida, Jankto, Schick
Czech Rep in Scotland goal 2 faia an hnehna Hampden Park ah an khel dawn a, Czech lam an ngampa sawt ang. Referee - Carlos del Cerro Grannde, Spain
England vs Scotland Dar 12:30 Am : Sap hoten Mizo lal Bengkhuaia kut atanga Zoluti an lak let kum 1872 atang a lo inkhel tawh, Football history a inhmelma hlun te kum 25 hnu a tournament pangngai a an intawn leh hmasakna ber tur hian ti ti a titam hle. Match hmasa berah England hian 2018 WC semi final an hneh loh Croatia lakah phuba lain goal khat faiin an chak a, Scotland erawh chu an khawtual ah Czech Rep lakah goal hnih faiin an mualpho thung.
England hi zanin a an chak chuan round 16 lut thaw thang an ni dawn a, Scotland lah an chak lo leh a nih chuan beisei an neih chauh dawn em avangin chak an tum ruh hle a ni. An inkhel tur boruak pawh a tang ru hle a, Scot pachal Man Utd Manager ropui Sir Ferguson meuh pawhin ngawih har a ti a niang, a chipui Scot chu chak ngei tur a a rin thu a sawi mauh mai.
English ho hi Scot hian an en chung lutuk bik lo, a chhan pawh hun kal tawhah an buan tawk ve tlat, England in Scot lakah hnehna vawi 48 an chan laiin Scot pawhin vawi 41 lai an lo hneh let ve bawk a, vawi 25 chu chak zawk awm lovin an indraw a ni. An inkhelh hnuhnun ber June 2017 ah pawh 2-2 in an indraw a ni. England leh Scotland player te hi Premier League a lo inhmachhawn thang, mizia leh khelh phung man em em an ni a, an in ngam khawp ang. Season liamta Premier League a Y/crad hmu tam ber (12 y/c) Scotland midfielder John McGinn pawh a insum det a ngai mai thei a ni.
Scot lamah inhliam vanga Czech Rep hmachhawn thei lo Arsenal back Kieran Tierney chu zanin hian a hmel a inlan tawh hmel a, England lamah Liverpool Captain Henderson pawh a dam fel tawh a, Man-Utd defender Harry Maguire pawhin training a zawm leh thei tawh bawk.
England hian 4-2-3-1 formation an hman a rinawn a, 1st eleven tur a rin Pickford, Trippier, John Stones, Mings, Kalvin Philips, Rice, Phil Foden, Mason Mount, Raheem Sterling, Harry Kane
Scotland 1st eleven tur a rin - Marshall, Hendry, Kieran Tierney, Hanley, ODonnel, John McGinn, McGregor, McTominay, Andy Robertson, Che Adams, Lyndon Dykes
England football in pui khawvel a Stadium dawng hlawk ber Wembly Stadion London ah an khel dawn a, mi 90,000 leng a ni nain 22,500 in an en ang. Referee Antonio Mateu Lahz, Spain
Post a Comment