UEFA chuan ‘away goals rule’ an hman thin chu an nuaibo dawn a, home & awaya a khelh hunah team pahnih te dinhmun a in ang a nih chuan extra time khelh chhunzawmin an la in hneh tawk zel a nih chuan penalty hmanga chak zawk zawn tur a ni.


    UEFA president Aleksander Ceferin chuan, “Away-a goal neih a pawimawh em em na chu a tawp dawn ta,” a ti a, he dan hman mek hi May thlaa UEFA club competitions committee-in an pawm hnuah UEFA executive committee chuan an pawm leh tawh a ni. 


    Away Goal Rule hi 1965 atanga hman tawh niin inkhelh vawi hnihah vawikhat chak ve tho si, goal an thun dan pawh in ang chiah si tla nghal an lo tam tawh a, hei vang hian nuaibo a ni dawn ta a ni. He dan hi paih dawn tak avangin Champions League, Europa League, Europa Conference League leh Women’s Champions League-ah hman a ni dawn a, khualkhuaa goal thun lawmawm dan a dang dawn ta. Team pahnihte inkhel ah goal thun khaikhawma chak zawk an awm nghal chuan chumi club chu chak zawk an ni anga, inkhel pahnih khaikhawmah chak zawk an awm loh chuan extratime khelin penalty thlengin an kalpui tawh dawn a ni.


    Caferin chuan, “Fair lo tia sawiselna tam tak awm thin kha a bo tawh dawn a, away goal neih that avanga goal chhuah loh tum ringawt a khelh ang te kha a bo tawh dawn ang. Inkhel a hmuhnawm zawk tura ngaih a ni,” a ti. “Home Away an khelha an dinhmun a intluk chuan 2nd leg away team ten minute 30 dang goal thun theihna hun an neih bik kha he thutlukna hian a nuaibo tawh dawn a ni,” a ti bawk.

Post a Comment

Powered by Blogger.