Khawvel mipui ngaihven Uefa Euro 2020 chu khelh mek chu Group Stage an zo ta a, Group winner leh runners up ram 12 bakah group tin a pathumna zinga ranking tha zual pali ten knock out stage, round of 16 an lut a.
Round of 16 lut te : Group A atangin kum 1968 a champion Italy, Wales leh Switzerland, Group B atangin FIFA Ranking No.1 Belgium leh 1992 a Champion Denmark, Group C atangin 1988 a Champion Netherland, Austria leh Ukraine, Group D atangin England, Croatia, 1976 a Champion Czech Rep. Group F atangin Sweden leh 1964, 2008 leh 2012 a Champion Spain, Group F tangin 1984 leh 2000 a Champion France, 1972, 1980, 1996 a Champion Germany, 2016 a Champion Portugal ten knock out stage an lut a ni.
Thlir bingna : Round of 16 atang hi chuan final thlengin knock out in khelh a ni tawh dawn a, extra time thlenga an khel a nih chuan substitute 6 hman theih a ni ang. Group stage ah hian inkhel vawi 36 a awm a, chungah chuan goal 94 tihluh a ni a, chawh rualin inkhel tumkhat ah goal 2.61 zel lut ang a ni.
Portugal Captain Cristiano Ronaldo chuan goal 5 ti lutin top scorer a ni mek a, a ni bakah hian goal 3 tilut tawh mi 5 an awm bawk a. Pierre Emile Hojberg, Demark leh Steven Zuber, Switzerland te chuan an thiante tih goal na tur vawi 2 ve ve an siam sak (assist) a. Yellow Card vawi hnih hmu mi 8 an awm a, Ethan Ampadu, Wales leh Gregorz Krychowiak, Poalnd te chu red card hmanga hnawhchhuah an ni.
Eng nge an inchuh : Champion te chuan Nomawi, Henry Delaunay Cup, inches 11.024 a sang, kg 2 a rit, silver tha ber chi (sterling) a siam an dawng dawn a. Nomawi bakah Gold medal leh pawisa fai an dawng tel bawk ang. Team 24 te hian tel man ah Rs 823,200,521 an dawng theuh a. Group stage ah an chakin Rs 133,492,976, draw ah Rs 66,745,988, round ah 16 ah Rs 177,989,301, quarter final ah Rs 289,232,615, semi final Rs 444,973,254, runners up Rs 622,962,556, champion in Rs 889,946,509 an dawng ang a. Champion ten a pumpuiah Rs 3,025,818,132 an pai pawn thei ang.
Bonus: Uefa atanga an dawn bakah an ram FA te chuan an player te chawh phur nan an thlensan dan a zirin an player te bonus pek an tiam hlawm a, hei hian player hote a ti phur hle. Kum 1966 World Cup hnu a khawvel huap football intihsiakna a champion nomawi la chawi leh ta miah lo England player te chu an champion chuan FA chuan player mimal tin te Rs 47,751,000 theuh pek a tiam a.
German leh World Champion France FA te pawhin an champion chuan an player te Rs 35,405,600 theuh pek an tiam a, Italy FA pawhin Champion nomawi an chawi an nih chuan player tin te Rs 17,692,624 theuh pek an tiam bawk a ni.
Stadium : Knock out stage atang chuan stadium 6 ah khelh a ni dawn a, semi final leh final chu khawvel a Stadium lian ber Wembley Stadium ah khelh a ni ang, 1996 hnuah Wembley Stadium-a Euro final khelh leh hmasakna ber a ni ang. Group stage a mi 22,500 en theih kha, semi final atang chuan mi 60,000 in an en thei tawh ang. Covid-19 lakah an fimkhurin Covid 19 test negative leh Covid-19 vaccine an la zo ngei (full course) tih fiahna neite chauh Stadium a luh phal a ni.
VAR: Referee Video assistant referee (VAR) chu Euro ah a vawi khatna atan hman a ni a. Roberto Rosetti, Chairman Uefa referee Comtt chuan an tum ber chu referee tanpui mai nilo, football hmasawnna a ni a, group stage a VAR an kalpui danah an lawmin, hmasawn zel erawh an tum thu a sawi. VAR vangin referee thutlukna vawi 12 tih danglam a ni a, VAR hmangin vawi 5 penalty pek a ni.
Offside a ham goal a pawm loh goal 2 chu VAR hmangin goal a pawm a ni a, goal anga ngaih vawi 5 lai VAR hmanga hnawl a ni thung. Referee te hi an nep lovin German referee Felix Brych hi PhD a ni a, Romania referee Ovidiu Hategan University zirtirtu a ni a, midang pawh hna zahawm tak thawk te an ni.
- biakthansanga khiangte
Post a Comment