STATEMENT OF LAL THANHAWLA PRESIDENT, MIZORAM PRADESH CONGRESS COMMITTEE

 STATEMENT OF LAL THANHAWLA

PRESIDENT, MIZORAM PRADESH CONGRESS COMMITTEE

Aizawl June ni 7, 2021

Mizoramin COVID-19 thawh hnihna kan tuar mek a, a vei pawh kan pung chakin, nunna chan pawh mi 50 chuang zet an awm ta a, hripui tuartute leh nunna chan zawng zawngte ka tawrhpui takzet a ni.

COVID-19 laka invenna atan Mizoram sorkarin April 19, 2021 atangin Total Lockdown a puang a, thla 2 dawnlai kan inkhung tawh tihna a ni. Total Lockdown hi thil tul tak niin lang mah se, total lockdown chhunga hri vei pun chak dante thlirin hripui do hneh tur chuan  inkharkhip piah lamah kawng dang kan dap tel a ngai ta takzet niin a lang.

COVID-19 thawh hnihna kan hmachhawn mekah hian thawh khatna ai chuan a veite pawhin an la na zawk a, nunna chan pawh nasa takin an tam zawk. Natna langchhuak (symtomatic) pawh a hma ai chuan an tam ta hle. Hei hian a entir chu hri kaite hian thawh khatna hunlai ai khan enkawlna an dawng har a, natna langchhuak hmanin, dinhmun khirh tak (critical stage) a awm, Oxygen pek ngai, ICU-a enkawl ngai an tam phah tih hi a ni.

Hetiang a nih avang hian hripui veite hi rang taka hmuhchhuah zung zung a, symptom a lanchhuah hma a enkawlna pek vat vat a, enkawl dam zung zung hi kan mamawh ta niin a lang a. Chu chu damdawi inenkawlna lama kan dinhmun nena thlir pawhin kan tih ngei ngei tur niin a lang. CCC leh CCCC-a enkawl dam mai theih an la nih laia hri veite hian enkawlna an dawn a ngai a ni. Chutianga kan kal a nih loh chuan Falkawn Referral Hospital leh ICU-a enkawl ngai, Ventilator hmanga enkawl ngai kan pung zel dawn a, chu chu sorkar tan harsatna lian tak a ni thuai dawn a ni; tunah pawh a ni mek bawk a.

Chuvangin, COVID-19 veite rang taka hmuhchhuah zung zung a nih theih nan leh rang taka a veiten enkawlna an dawn zung zung theih nan Test Runpui (Mass Detection Drive) nei turin Mizoram sorkar ka ngen a. Hetiang zawnga COVID-19 hripui dona hi kan kalpui a nih loh a, Total Lockdown (Inkharkhip) hmang ringawta kan do dawn a nih chuan Mizoram mipui tam zawk hi ‘inkhaichhuah leh harsa khawp a dinhmun chhiaah’ kan ding hman ang tih a hlauhawm hle a ni. 

Sd/-

LAL THANHAWLA

President