SONAPUR - ZIRLAITE LUNGLAI LUAHTU

Rohlupuia Chhangte


Meghalaya ram chhung, East Jaintia Hill-ah khuan khaw hmingthang tak pakhat a awm, a hming chu Sonapur a ni. 

He khua hnaisailo tak mai hi Shillong, Jowai-Badarpur-Silchar Road, National Highway 44-in a paltlang ruah mai a, Mizoram, Tripura, Cachar leh Guwahati lama chengte tan kawng pawimawh kumhlun a ni a, rel leh thlawhna hmanga  kan zin te a nih ngawt loh chuan he kawng hi Pawla kawt chhuah ang maia pumpelhna awm miah lo, paltlang ngei ngei ngai a ni. 

Vawiina kan ram hruaitu, politician leh officer chhuanawm tak tak te leh kan nu leh pa te pawhin he kawng hi an lo zawh tawh ṭhin a; kum dang ang chu nise, zirlai za tam takin Shillong lama zirna sang zawk zawm turin he kawng hi an paltlang leh ngei ang le.

He hmun hi Narpuh Reserve Forest huamchhunga awm a nih avangin ngawpui chhah takin a tuam hring nghulh a, ramsa leh nungchate pialral a ni. A ram hi a chhengchhe em em a, kham chawivel ram a ni. Chuvangin helai hmuna lirthei chetsualna a thlen chang pawhin nunna chan an tam thei hle! Ngaw hi a zau hle a, Assam ram leh Bangladesh ram ngaw nen a inzar zawm a ni. 


Sonapur hian hmingthanna pathum a nei a:-

1. Sonapur kianga lui luang hi Lubha lui a ni a, he lui sangha tuizia hi hahipin an sawi ṭhin. Sanghate hi nghakuai hmang chauha man phal a ni. 

2. Lubha lei (bridge) hi a hmingthang hle bawk. A lai laklawhah a dona awm miah lova dawh tlang pawp a ni. A lei sei zawng ngaihtuahin hetianga engineer ten an dawh thei hi ropui tak a ni. Kum 1968 hma lam kha chuan he bridge hi a la awm lova, pumhrut lawnglengin an kalkai ṭhin. Zikpuii pa pawhin he luia an inkarkai dan chanchin chu a article pakhat 'Luba luipui fawn vel mahse' tihah khan ngaihnawm takin a lo ziak tawh a nih kha. Lei aṭanga hla lo teah Lubha lui hi Bangladesh ramah a luang lut ta a ni. 

3. Sonapur hmingthan lehna pakhat chu leimin kumhlun thlen ṭhinna hmun a ni hi a ni. Leimin venna tur hian hma lak ni ṭhin mahse tlang pang awih lutuk a nih avangin a sawt mawh hle. A min duhzualna hmun pakhatah phei chuan BRO hoten leiverh (tunnel) sei deuh mai an siam ta hial a ni. Leimin tirapthlak lehzualtu chu a thlang lawk kawr ruam thuk taka Lubha lui lian so but but ṭhin, zahngaihna hmel reng reng pu ngai lo chu a ni. 

Sonapur leimin hian he kawng zawh ṭhintu zin veivakte tan harsatna namen lo a thlen kum tin a, a bikin tun hma lama Shillonga zirlai awmte phei kha chuan an tuar bik hle. ATM leh smart phone lo chhuah hma leh tunlai anga bank kaltlanga pawisa inthawn zung zung theih hma, hmelhriat kal remchang leh 'Dak' hmang chauha lehkha leh sumpai inthawn theih hun laia lengte lunglai luahtu a ni. 

Sonapur/Lubha bridge aṭanga Km 2 velah hian helai ruam chunga roreltu leh awptu niawm takin kopang lung bang nghengin Hindu Durga Mandir a ding a, he kawng zawha zin veivak, Hindu sakhaw betute chuan a ngai puithuin an thlamuanpui hle ṭhinin a rinawm. Kristiante thinlungah erawh hmun ropui tak a chang pha ve lo maithei.

Engpawhnise, ṭuan ṭul vanga he kawng lo paltlang tawh, Sonapur leiminin an chunga harsatna namen lo thlen a, a lo hrek tawh zirlai za tam liam tate khan helai ruam reh leh ṭihbai-awm tak hi an hre reng tawh anga, an damchhunga an lunglai luahtu a la ni fan dawn a ni.

Post a Comment

Powered by Blogger.