Lawngtlai June 26 : April 29, 2021 a Ngengpui Wildlife Sanctuary Saiin a beih avanga nunna chan ta Pi Hnianghniangi chhungte hnenah sorkarin zangnadawmna cheng nuai 2 a pe dawn. 


    Hmunnuam JAC ten May 1, 2021 khan Pi Hnianghniang Sanctuary Saiin a beih avanga nunna a chan avang hian he Sai hi May thla chhung that emaw lasawn turin sorkar an ngen a, mitthi chhungte chu zangnadawmna pe turin leh mitthi pasal chu a phu tawk sorkar hna pe turin sorkar an ngen bawk. 


    Hmunnuam JAC te thuchhuah hi bialtu MDC Pu Hc. Lalthawmliana’n bawhzuiin, Pu Hc. Lalthawmliana hian PCCF, Mizoram chu a office-ah hmuin Hmunnuam JAC te thil phut hi a sawipui a, PCCF chuan Saiin mihring nunna a la chu pawi a tih thu sawiin, mitthi chhungte chu zangnadawmna atan cheng nuai 2 pek a nih tur thu a sawi a ni. Bialtu MDC Pu Hc. Lalthawmliana chuan an thil phut dang la tihhlawhtlin lohte chu a hlawhtlin theih nan hma an lak zel tur thu a sawi bawk. 


    Hmunnuam JAC hruaitu atanga thudawn danin, Sai hi Sanctuary Sai ngei a ni a. Sai hi Sanctuary pawnah lo chhuakin Pi Hnianghniangi chu a um lut niin a sawi a. Pi Hnianghniangi thihna hmun, Sialphei lui hi Sanctuary chhung vek a ni lova, a hnar lam hi Sanctuary pawn a ni a, a mawng lam hi Sanctuary chhung a ni. Sialphei lui hnar, Sanctuary pawn atang hian Sialpheilui mawng lam, Sanctuary chhungah Pi Hnianghniangi hi a um lut niin a sawi. Sanctuary tih hriatna tur fencing emaw Pillar emaw helai hmunah hian tar a ni lo a ti bawk.

Post a Comment

Powered by Blogger.