Lawngtlai 14.06.2021 : Rauthla Today chhiartu zawng zawngte chibai vek ule. Vawiin hi Mizoram in Lockdown a puan atanga ni 56-na chiah a ni a. Tin, World Blood Donors day niin khawvel hmun hrang hranga thisen pe thin tu te chawimawiin awm rawh se. Thisen pe la, nun chhanhim rawh. Vawiin a thil thleng thenkhat te lo tarlang leh ila.


1. Vawiin khan Mizoram hmun hrang hranga Covid-19 enkawlna hmun atangin 131 an chhuak. Aizawl - 62, Lunglei-32, Kolasib-14, Serchhip-9, Champhai-6, Siaha-4, Khawzawl-3 leh Mamit-1 te an ni.

2. Mizoram puma ni 20.04.2021 atanga COVID-19 laka inven nana inkhuahkhirhna khauh zawka kalpui chu Lawngtlai khawpui chhungah pawh khauh taka kal chhohpui zel a ni a. Lawngtlai khawpui chhung veng 12-a COVID-19 Executive Duty-te chuan vawiin khan dan bawhchhia mi 19 manin, he'ng an mi mante hi pawisa ₹ 1,900/- chawitir an ni a. COVID-19 vanga inkhuahkhirhna kalpui chhung hian dan bawhchhia mi 1,183 man tawh niin, pawisa chawitir zat hi ₹ 1,37,450/- a tling tawh a ni.

3. Vawiin Ni 14.06.2021 hian Lairam Isua Krista Baptist Kohhran College Veng, Hermon Local Church ten Covid-19 dona atan Rs 5000/- an hlan. Kohhran aiawhin Upa J.Ropianga'n a hlan.

4. Lairam Isua Krista Baptist Kohhran Central Church ten District Level Task Force, Lawngtlai Chairman Dr.Andrew H.Vanlaldika hnenah Covid-19 dona atan Rs 50,000/- an hlan

5. Vawiin khan Employees Union, MRB ten  DLTF Chairman hnenah Covid-19 dona atan Rs 20,000/- an hlan

Tin,Employee's Union, MRB ten District Covid Health Care, Lawngtlai District tan Rs 10,000 an hlan bawk.

6. Vawiin khan Thalai Kristian Pawl, Bethani Unit ten Ruby Jubilee lawmna atan District Hospital, Lawngtlai ah Poor Fund atan Rs 5000 an hlan.

7. Vawiin khan Mizoram-ah Covid-19 avanga nunna chan mi panga an awm.Chungte chu : Pi Rochhingvungi (91), Electric Veng Aizawl, Pu H.Hrangkima (84), Chhinga Veng Aizawl, Pi Elizabeth Lalrinpuii (32), Dawrpui Vengthar, Aizawl, Pi Rohlupuii (62), Khawzawl leh Pi H.Lalthlamuani (59), Tuithiang Veng Aizawl te an ni.

8. Lunglei Civil Hospital TrueNat Laboratory-a hman tur Molbio Truelab Quattro khawl pahnih leh a kaihhnawih khawl dang engemawzat Agriculture Minister leh Lunglei West bialtu MLA ni bawk Pu C. Lalrinsanga leh Lunglei HPC Vice Chairman leh Lunglei East bialtu MLA ni bawk Pu Lawmawma Tochhawng ten an MLA Fund atanga an donate chu vawiin khan Aizawl atangin Lunglei rawn phurh phei niin tlai dar 3-ah khan Lunglei Civil Hospital rawn thlen pui a ni.

9. Vawiin khan District Level Task Force, Lawngtlai ten meeting an nei a. Chawlhkar liam taa dawr hawn dan chu tlema her danglam hretin, thlai hnah, chawhmeh leh ni tin mamawh (essential commodity) zuarte chu ni thum (Thawhlehni, Ningani leh Inrinni-ah te) zing dar 5:00 atanga zing dar 11:00 thleng an inhawn remtih a ni a. A bak dawr dang, thawmhnaw leh in sakna bungraw zuar ang chite chu Thawhtanni leh Zirtawpni-ah te zing dar 5:00 atanga zing dar 11:00 thleng an inhawn remtih a ni thung. Thlai hnah, thlai rah leh thei, chhe hma bik ang chi chu dawr hawn theih hun bakah hian VLTF-te'n a tul a nih chuan a mamawhtute ina sem kual (home delivery) dan ruahmanpui ni se, tih a ni a. Thingpui dawr/restaurant te pawh mipui dawr tura inhawng lovin, home delivery erawh an kalpui remtih a ni.


10. Vawiin hi World Blood Donors Day ani a. Kum dang ah chuan Bloo donation Camp buatsaih thin a ni a. Kumin hi Covid-19 avangin donation camp buatsaih theih a ni lova. Nimahsela, mi tlawmngai ten District Blood Bank, Lawngtlai ah Thisen Unit 7 an pe.


Post a Comment

Powered by Blogger.