Lawngtlai June 18 : Ran damlo enna Ultrasound khawl leh AH&Vety Department, LADC Help Line chu vawiin khan Pu Manghmunga Chinzah, CEM, Lai Autonomous District Council chuan hman theih turin a hawng.
CEM Pu Manghmunga Chinzah chuan, LADC a AH&Vety Department in ran damlo enna khawl thar a nei thei chu lawmawm a tih thu sawiin, ran vulhtuten tangkai zawka an hman a beisei thu a sawi a, mihring leh ran te chu inzawmna thuktak nei kan nih vangin, ran hriselna ngaihpawimawh kawngah mipui thangharh mek dolet theitura AH&Vety Department inbuatsaihna chu thil lawmawm tak a ni a ti.
Vawiin vek khan Pu Manghmunga Chinzah CEM chuan ran damlo chungchang leh AH&Vety Department LADC berawn duh tan Telephone hmanga an biakpawhna tur Telephone line a hawng nghal bawk.
Vawiina LADC a AH&Vety Department khawlthar hawnnaah hian Pu Sanghuliana Mualchin, Executive Member i/c AH&Vety pawhin thusawiin, CEM zahawm takin ran vulhtuten harsatna an neih sutkian a nihtheih nan a thahnem a ngaihna vangin Ultrasound khawl neithei an nih thu a sawi.
Dr. Lalnunpuia Chinzah DCVO, LADC chuan khawl an neih theih dan leh a tangkaina sawiin, Mizoram chhimlam ah Sorkar in ran enna tur Ultrasound a neih hmasak ber a nih thu a sawi. Vawiin hun hi Pu H. Lalramenga Executive Secretary leh official dang ten an hman pui bawk.
Post a Comment