Lawngtlai June 23 : Vawiin June 23, 2021 khan MNF Thalai Pawl, District Hqrs. hruaitute chu Josefa Buhzem an hawn atangin an luangchhuak.
Vawiin khan MNF Thalai Pawl, District Hqrs. Lawngtlai te chuan an President Pu Elvis Lalthangzuala hovin Josefa Buhzem atanga sum an hmuh te Covid-19 dona atan District Level Task Force, Lawngtlai Chairman Dr. Andrew H. Vanlaldika hnenah Rs 10,000/- an hlan a. Tun hnaia Covid-19 positive an hmuh tamna hmun Karlui-I Village Level Task Force te hnenah Buhfai bag 10, Alu leh Dal an hlan bawk a. Karlui-I VLTF aiawh hian an Bialtu MDC Pu Tuturu Singh hnenah an hlan bawk a ni.
Tin, MNF Thalai Pawl, District Hqrs. Lawngtlai te hian Chief Medical Officer, Lawngtlai Dr. LP. Malsawma hnenah Covid-19 dona kawnga hnathawktu Medical team te'n tangkai taka an hman atan Rs 5000/- an hlan bawk a. Hemi bakah hian Thingkah IR hmuna Covid-19 avanga enkawl mek te pualin dt 23.06.2021 zanriah an buatsaih sak bawk a ni.
MNYF President Pu Elvis Lalthangzuala chuan, mi inphal tak tak te kaltlang a, hri leng dona kawnga ke kan pen thei hi a lawmawm tak zet a. He Josefa Buhzem hi midangte malsawmna Buhzem lo nise, mi harsat zawk te leh hri leng mek dona kawngah he buhzem hi tangkai takin kan hmang chhunzawm zel dawn a ni a ti.
Vawiina Josefa Buhzem semchhuahnaah hian Pu Lalthanmawia Colney, Vice President MNYF, MDC ni bawk, Pu Rohmingliana, Treasurer leh General Secretary pathum Pu B.Lalramsanga, Nl. Lalnunchami Ralte leh Pu Jonathan VL. Rempuia te an tel a ni.
Post a Comment