Lawngtlai June 17 : Kumin April thla atang khan Lawngtlai RD Block huam chhungah ni za inhlawhna, MNREGA hnuaiah work 3 chhuak tawhin, ni 35 inhlawhna neih tawh a ni.

    Ni za inhlawhna hi Lawngtlai RD Block huam chhunga khua 44 ten ni 35 theuh an thawk tawh a, hetih lai hian thlakhata work an neih zat chu khaw tinah a inang lo hlawm. April thla chhung khan ni za inhlawhna atan hian Rs. 30,366,000 sen a ni a, May thlaah Rs. 27,278,708 sen niin, June thla kalmekah 39,325,681 sen a ni bawk a. Kumin April atanga June thla thleng hian ni za inhlawhna atan hian 96,970,681 sen tawh a ni. April leh May thla hlawh hi sem chhuah tawh a ni a, June thla hi la thawh mek a nih avangin pawisa hi la pek chhuah a ni lo.

    Thla thum chhunga ni za inhlawhna sen tam berna hi Lawngtlai Chandmary a ni a, April atanga June thlengin Chandmary-ah hian ni za inhlawhna atan Rs.8,860,525 sen a ni a, thla thum chhungin Upper Saikah ah Rs. 557,025 sen niin, inhlawhna pawisa sen tlemna ber a ni. Hetah hian June thla hlawh la thun loh chhut tel a ni.

    Pu Lalthakima Chhangte, BDO, Lawngtlai chuan Lawngtlai RD Block huam chhunga khaw tina MNREGA hnuaia hnathawhte chu a tha tlangpui tih a sawi a, khawtlang rorelna (Gram Sabha) ah hnathawh dan tur sawiho thin a nih avangin hna chhe lutuk a awm lo a ti a. Official lam duhkhawp loh deuha hnathawh a awm a nih chuan an thawh that tir leh thin niin a sawi bawk.

Post a Comment

Powered by Blogger.