Lawngtlai June 17 : Vawiin June 17 khan LADC a LAD Department leh Sanitation Department ten hun rei tak an lo buaipui tawh, Lawngtlai khawpui bawlhhlawh paihna leh Septic tank sawngbawlna tur KMMTP Road-a Phaikhang mual a mi chu a bultanna hnathawh a ni.
Vawiina hna bul tannaah hian Pu Malsawtluanga Hlawnchhing Sr. AE, LADC chuan ruahmanna siam a nih dan leh hmalak dan tur report a pe a. He hunah hian Pu T. Lalengmuana EM i/c LAD chuan thusawiin, India ram leh Mizoramah pawh hetiang project tha leh changkang tak nei hmasa zinga mi kan ni thei tur chu lawmawm a tih thu leh a buaipuitu Official-te chungah leh kawng tinrenga hemi atan a phurpuia theih tawpchhuaha nawrkaltu Lawngtlai Town VC te inpekna zawng zawngah lawmthu a sawi bawk. Pu T. Lalengmuana chuan theihtawp a phurpuitu leh theihtawp chhuahpuitu Pu Manghmunga Chinzah, CEM, LADC chungah lawmthu a sawi bawk. Pu T. Lalengmuana, EM chuan he hmalakna a puitlin theih nana ram petu, Pu V. Zirsanga, Chairman LADC, Pu T. Zakunga MDC, Pu ST. Laldailova Ex. MDC te chungah thin lung takin lawmthu a sawi.
Pu Lalropuia Chinzah EM i/c Sanitation pawhin thu sawiin, LADC Sorkarinin hmasawnna rahbi thar kan rap chho mek zel a, thawhhona leh inlungrualna kan neih chuan hmasawnna rahbi thar kan nei zel dawn a. Vawiinah pawh Lawngtlai Town VC te inpumkhatna leh thawhhona tha tak avangin ram tan rohlu tak kan nei thei dawn ta hi a lawmawm hle a ni a ti a. Pu Zoramthanga CM leh Pu Manghmunga Chinzah CEM te kaihhruaina hnuaiah hmasawnna tur dang pawh kan la nei zel dawn a ni a ti bawk.
He hnathawh a nih theih nan hian 15th Finance Commission atangin Rural Local Body te hian an area chhunga hmasawnna hnathawh tur Rural Local Body Grant an population tam dan a zirin pawisa an dawng thin a. He pawisa hmanna tur hi hmun hnihah; Tied fund - pawisa dawn tur atanga 50% hi Water Supply leh Sanitation atan chauha hman tur leh Untied fund - Pawisa dawn tur 50% hi hmasawnna tura hnathawh nan ah te then a ni a,VC ten Gram Sabha kaltlangin an hmang ang.
Lawngtlai Town VC te leh Pu T. Lalengmuana, EM LAD te February 17, 2021 a thukhawm chuan heng hmasawnna sum lo kal hi mahni veng chhung chauha thawk lovin, Lawngtlai khawpui tana rotling tur siamna atan hmunkhata hnathawh nan hman nise an tih avangin he Feacal Sludge Treatment Plant (FSTP) hi lo piang chhuak a ni a. Lawngtlai khawpui chhunga mite Septic tank leh bawlhhlawh sawngbawl dan mumal lo thin tak chu felfai zawka sawngbawl a nih theih nana veng hrang hrang VC te thahnemngaihna leh an thawhkhawm Rs. 97,74,500.00 atangin he hna hi thawh a ni dawn a ni.
He hna zawng zawng hi Lawngtlai Town chhung VC ten thawkin LAD Department ten uluk taka enpuiin ruahmanna an siampui thin dawn a ni.
Post a Comment