LAWMTHU SAWINA LEH NGAIHDAM DILNA
Dt. 2.6.2021 zana VLTF duty leh Pu HVL.Hruaidawngzela-te kut inthlak palh chungchang kan Minister zahawm tak Dr. K. Beichhua-in a lo hriatin a bial chhunga thil thleng a nih avanga pawi a tih em avang leh Pu Dawnga hi a tuarpui em avangin vawiin 6.6.2021 khan Pu Dawnga nu leh pate chenna in Chatlangah a va kal a. Minister hian keini Council Vaih, Siaha VLTF te, lock down khirh lehzuala kalpui a nih dawn tak avanga Aizawl kal a remchan loh avangin ngaihdam min va dilsak nghal bawk a ni.
Pu Dawnga nu leh pate leh a unaute hian kan bialtu MLA, Minister ni bawk hi rilru inhawng leh zau tak, puitling takin an lo dawngsawng a. Pathian tih mi an nihzia kan bialtu an lo dawnsawn danah hian a hriat a, Council Vaih VLTF chuan zahna chibai a buk a ni. Kan aiawhin Minister hian Pu Dawnga inenkawlna tur Rs 30,000/ pawh min hlansak nghal a. Rilru engthawl leh hahdam taka min siamtu Pu Dawnga nu leh pate leh kan Minister chungah thinlung takin lawmthu kan sawi a, Pu Dawnga pawh a that chhoh thuai theih nan duhsakna kan hlan a, kan tawngtaisak reng bawk a ni.
Dr. K. Beichhua chuan a bial chhunga hetianga tharum thawhna a thleng chu pawi a tih takzet thu sawiin thleng nawn leh tawh ngai lo se a duh thu a sawi a. Khaw tin leh veng tin VLTF te inpeknaa lawmthu a sawi rualin mi tina leh tharum thawh lo zawnga duty theuh tur pawhin a chah nghal bawk.
A tawp berah chuan Zoram mipuite hnenah thupha kan chawi a, ngaihdam kan dil che u a. He kan thil tihsual palh hi min hriatsak reng lova ngaihdamna thinlung nena min nawhrehsak turin mi tinte Pathian hmingin kan ngen che u a ni.
Issued by Village Level Task Force: Council Vaih, Siaha
6.6.2021
Post a Comment