Lawngtlai June 26 : Lawngtlaiah Bawrhsap hovin kum thum kal ta chhunga HSLC leh HSSLC exam-a Lawngtlai District result thlir ho a ni.
Nimin khan Lawngtlai District Bawrhsap, District Education Committee Chairman ni bawk Dr Andrew H. Vanlaldika hovin Lawngtlai DC Conference Hall-ah kum thum kal ta chhunga HSLC leh HSSLC examination-a Lawngtlai District chhunga sikul hrang hrang result thlir ho a ni.
He hunah hian Lawngtlai District Education Department lam hotute leh Lawngtlai khawpui chhunga high school leh higher secondary school hrang hrang Principal/Headmaster leh zirtirtute bakah, Lai Students' Association (LSA), Central Young Lai Association (CYLA) leh Lai Women's Association (LWA) ai awhte an kal khawm.
Bawrhsap Dr Andrew H. Vanlaldika chuan thil eng kimah zirna chu a bul thuta pawimawh ber pakhat a nih zel avangin ngaih pawimawh a, chawi san zel a tul a ni, a ti a. Zirna kawng leh hna zawnna kawngah pawh a ti tha zinga Lawngtlai District a lan zel theih nan District chhunga zirna chu tihchangtlun a, tan lak a tul tih sawiin, zirtirtute leh Education Department chu nasa zawka tan la a, pheikhai rual taka ke pen turin a chah.
Kal khawmte chuan kum 2019 atanga kum 2021 thleng (kum thum chhung) result enin, kum tin hma sawn zawnga Lawngtlai District a kal chu lawmawm an tih thu sawiin, hma sawn zel turin tha thlah lova tan lak sauh sauh a tul an tih thu an sawi a. HSLC leh HSSLC-a result tha nei turin pawl hniam zawk (elementary level) atanga zirna uluk a pawimawh an tih thu an sawi bawk.
HSLC-a Lawngtlai District chhunga zirlai pass percentage chu - kum 2019-ah 49%, kum 2020-ah 50.50% leh kum 2021-ah 65.07% a ni a. HSSLC-a Lawngtlai District chhunga zirlai pass percentage chu - kum 2019-ah 42.10%, kum 2020-ah 54.90% leh kum 2021-ah 68.90% a ni thung.
Post a Comment