Lawngtlai 12.06.2021 : Karlui-I khua huam chhungah mipui zinga Covid-19 kai hmuh belh zel a ni a. Medical team te’n Active Case Search (ACS) neih an duh vang leh Medical Officers, Bungtlang  ‘S’ rawtna angin test mumal taka kalpui anih theih nan leh vantlang zinga hri inkai darh zel tur ven nan, Lawngtlai District Deputy Commissioner Dr.Andrew H.Vanlaldika chuan, The Mizoram Epidemic Diseases (COVID-19) Regulations, 2021 leh Mizoram sawrkarin Order No.B.13021/101/2020-DMR/Vol-IV dt.05.06.2020 hmangin Dt 8.06.2021 khan thu leh awm hma atan Containment Zone-ah a lo puang tawh a ni.



    Lawngtlai District Bawrhsap in Containment area-a a puan bawhzui hian Dt 10.06.2021 khan Medical team, Dr.Elsadai Lalbersiam, Dr.Zonunmawia leh an mahni puih turin thawk tu dangte nen Karlui-I hi an pan a. An ni bakah hian Bungtlang South Medical Officer, Dr.Johny-a leh Sample Collection team ten Karlui-I hi thlengin Active Case Search hi neih tan nghal a ni.



    Karlui-I ah hian nihnih chhung in Covid-19 positive 147 hmuhchhuah thar an ni a. Mipa 77 leh Hmeichhia 70 ten an ni. Hei hi Lawngtlai District ah nihnih chhung leka, khaw mal a hri kai hmuhchhuah tam ber record a tling hial a ni. Medical Team te hian Active Case Search an nei a, ni khat-na ah sample 306 endik an ni a. Heng zing atang hian Covid-19 positive 65 hmuhchhuah an ni a. Mipa 32 leh Hmeichhia 33 an ni a. Community Covid Care Centre (4C) ah mi 20 dah luh nghal an ni a. A bak 45 te hi chu Home Isolation nghal an ni. Medical team te leh VLTF te’n theihtawp an chhuah nghal a, damdawi te sem nghal a ni a. 4C atan hian Primary School leh Middle School te hman a ni.



    A nihnih-na (11.06.2021) Medical team ten sample test an neih chhunzawm leh nghal a. Sample 372  endik atangin Covid-19 positive 82 hmuhchhuah belh a ni a. Mipa 45 leh hmeichhia 37 an ni. Mi pasarih (7) te chu 4C ah dah luh an ni a, a dang 75 te chu Home Isolation tih nghal an ni.
    Karlui-I ah hian mihring 935 an awm mek a. Sample endik 678 atangin Covid-19 positive 147 hmuhchhuah an ni a, sample endik atanga hri kai percentage hi 21.54% a ni.
    Home Isolation a tam na chhan ber hi chhungkua 44 (chhungkaw hlang) te chu Covid-19 hri kai an nih vang a ni. 

Sorkar report ah ava lang love : Hemi ah hian zawhna tam tak a awm a. Nihnih ah pawh sorkar report ah a lang Miah lo hi Mipui zawhna tam ber a ni. A lan loh chhan chu hetiang hi a ni. SRF ID hi medical lam hian an generate zo thei lova. Positive an awm hian Online in an ID tur siam a ngai thin a.Chu chu SRF ID an tih chu a ni. Hetiang a an tih zawh hnu hian portal ah upload a ni a. Tichuan, DIPR report ah tarlan a ni chauh thin. Hei hi vawiin lamah chuan an zo fel hman tura beisei an ni.




    Bialtu MLA Pu C.Ngunlianchunga’n tanpuina a hlan : Vawiin ni 12.06.2021 hian  Pu C.Ngunlianchunga, Lawngtlai West MLA chuan Buhfai Bag 8, Alu leh Dal, Bag hnih ve ve, leh kutsilfaina thahnem tak Karlui-I a hrikaite tan a pe a, heibak ah hian Pu C.Ngunlianchunga chuan Karlui-I VLTF te chu hri laka invenna hmanrua Glove leh Hand Sanitizer a pek bak ah, Hrikai zawnchhuah hna thawktu Medical Team te chu pawisafai Rs. 10,000/- leh Hand Sanitizer leh Glove thahnem tak a pe bawk.

            Lawngtlai West MLA chuan a bial chhunga hrikai an pun nasat vangin, mipuite thlaphanglo turin a chah a, bialtu MLA a nihna angin harsatna an neihte sutkian a nihtheih nan theihtawp a chhuahzel tur thu a sawi.



Post a Comment

Powered by Blogger.