EURO 2020 LEH KRAWS
Europe khawmualpui a football khel thiam ber ram zawnna Euro 2020 Group matches Denmark leh Finland te khelh dawn a, an ram flag an rawn pho lan khan ka thinlunga Kraws ngaihhlut awm zia a lo lang tlat mai a. Lei leh van lalber in a hringnun vuiliam nana a rawn hman hma kha chuan Kraws hian endawng leh hmusit a hlawh a. An hmanna pawh a tui tang lovin misual chung chuang, ram hmelma _(State enemy)_ te tihhlum nan a ni awm e.
Mahse, Pathian fapa meuh in thihna atan a rawn hman tak ah chuan khawvel a thil hlu ber ah a chang ta a. An ram chhinchiahna Flag ah te, thi ah te zungbun ah te, bengbeh leh tlereuh chi hrang hrangah te an hmang uar ta hle a ni. Euro 2020 khel tur ram 24 zingah ringawt, an National Flag a Kraws lem chuang ram panga lai a han awm te hi, Isua thisen a thlawnin a far loh zia leh Isua thihna hian kawlkil thleng a fan chian zia a entir chiang hle in ka hria a ni.
Isua Krista Kraws chawilar tu pakhat chu Roman Emperor zinga Kristian hmasa ber *Constantine Ropuia (AD 272-337)* a ni awm e. Constantine chu Maxentus nen indo tum-a an in ep laiin vanah, Ni bul lawkah Kraws lem a hmu a, a hnuai ah chuan latin tawngin, *‘ In hoc signo vinces,’* *‘He chhinchhihana hmang hian hneh rawh,’* tih a inziak kulh a. Mahse, Kraws mite hmusit leh endawng, misual te tihhlumna chu a ngaihsan loh em avangin a bengkhawn mai lo va.
Mahse, zanah a mumangah Isua a hnenah a inlar a, Kraws hmanga a hmelma te hneh tura a tih leh takah chuan a sipaite awmphaw ah Kraws lem ziah tir vek a. Maxentus nen chuan nasa taka indovin Oct.28.312 ah historian ten an indona hminga _Battle of the Milvian Bridge_ ti a an vuah ah chuan hnehna a chang ta a ni. Chumi hnuah Kristian ah inlet in, Roman Emperor zinga Kristian hmasa ber a ni a. Rom ram awp chhunga Kristian tihduhdahna pawh khauh takin a khap a, Kristian te an zalen ta a ni.
Nang leh kei pawh hi bawhchhiatna vanga tenawm leh bawlhhlawh, ke phah hnuai atanga lu chhip thleng zakin dam lai reng awm lo, pem te, vuak duk chur te, pan hnai la te hlir a ni. (Isaia 1:6) Thil lung leh changpat ang maia tenawm leh blawhhlawh (Joba 25:6) kan ni.
_Lal Krista thisen thianghlim ah chuan_,
_Bawlhhlawh ber pawh silfai kan ni_.
Ni e, Isua Krista Kraws thisen thianghlim ah chuan kan tenawmna, kan bawlhhlawhna, kan sualna zawng zawng te nen tlenfai, silfai, tihthianghlim kan ni ta. A va ropui em, Lalpa chu fakin awm rawh se.
Hlutna leh mawina, thatna reng neilo te pawh Kraws vang chauh hian kan hlu in kan lo mawi thei ta a ni. Kraws hlutna leh pawimawhna hmu a piang hian an ngaisangin, an ngaihlu thin a ni.
Kraws hlutna hmu chiangtu zingah chuan American thuhriltu leh hla phuah thiam George Bennard (1873-1958) hi lam hmaih chi a ni lovang. Bennard te hian kum 1912 kum tawp lamah revival meeting an nei a, chutah chuan Isua Krista Kraws chu mi endawng leh hmusit ni mahse, a ni ang misual chhandama tur a lei leh van lal ber thihna a nih vangin a tan a hlut zia a thinlungah fiah takin a lo lang a. Tichuan a, *‘A saw raltiang tlangah, Kraws hlun tak chu a ding,’* tih hla chang khatna chu awlsam te in a ziak chhuak ta mai a.
A chang dang phuah zawm a han tum leh ngial pawhin, a thinlungah a chhunzawmna tur reng a lang thei hauh lo mai a. Tichuan, Evangelist ve bawk Ed E Meiras nen Chicago atangin Sturgeon Bay, Winconsin a Friends Church ah revival meeting Dec. 29.1912 atanga Jan. 12.1913 inkar ah an nei a. An boruak pawh a tha in, an hlim hle mai a.
Chutia rawng a bawl lai chuan a thinlungah Kraws vang chauh hlu leh rawngbawl thei a ni tih chiang takin a lo lang a. A Lalpa Kraws chu miten hmusitin, endawng mahse a tan chuan chu aia hlu leh duhawm a awm loh avangin a thih thlenga duat leh rinawm taka vawn tlat chu a tihtur a ni tih inhria in, a hla phuah zawh loh inserhna hla ropui tak, *'A saw raltiang tlangah Kraws hlun tak chu ding*,' tih chu a phuah zo leh thei ta a ni.
Ringtu ten sual leh a hnathawh kan hnehna tur a kan ralthuam tha ber, kan chakna chu Isua Kraws a ni. Kraws a awmhmun rem a, Kraws behchhan a rawngbawl te chu Setana hian engti kawng mahin a khawih thei lo a ni. Chuvangin kan damlai ni kawl a liam hma chu, rinawm leh nghet tak a kan chakna Kraws, thiam kan channa Kraws, kan mawina Kraws hi vuan tlat tu kan nih theuh theih nan, Lalpa’n malsawm rawh se.
- Biakthansanga khiangte
Post a Comment