Dr Maongwati Aier. IAS(Rtd), Nagaland testimony

Kum 2010 June thlaah khan Kohima khawpuiah Chief Secretary hova Deputy Commisioner-hote inhmuh khawmnaah ka tel ve a. Chutia kan thut khawm lai chuan lung lamah harsatna lian tak (severe heart attack) ka nei ta thut a. Hmanhmawh takin Delhi lamah min thlawh thlakpui a, Escorts Hospital-ah min admit ta rum rum a. India rama lung lam doctor hotupa (Chief Cardiologist) in min enkawl avangin tha chhuak leh mai turah ka inngai a. A tuk June 23-ah chuan a hma aia nasa zawkin heart attack ka neih belh leh ta a, ka lung leh ka chuap chuan hna an thawk ta hauh lo mai a. Dimapur khawpuia cheng te, ka lainate leh chhungte chuan Delhi ka thlen thlak hnuah heart attack ka neih nawn leh thu chu an lo hria a. Damdawi ina awmte chuan ka chanchin chu ka chhungte leh Nagaland lam an han hrilh a. Ka dinhmun a that loh em avangin min vui dan tur an ruahman nghal chuk chuk a.

Inzaina pindana min lak luh hma lawk chuan ka fapa upa ber chuan min nawr mek a ni tih ka hmu riai ruai a. Ka fapa hmel ka han hmuh chuan ka tap ta zawih zawih a. Reiloteah fahrah a ni mai dawn tih ka hriat avangin ka lungngai em em a, Lalpa hmaah mittui tlain ka au chhuak ta a. Ka chakna zawng zawng sawm khawmin, “Aw Lalpa, ka chungah zah ngai rawh, Aw Lalpa, ka chungah zah ngai rawh,” tiin ka au va, chu bak chu tih theih dang ka nei tawh lo.

Doctor pasarih zet chuan min buaipui a, ka dinhmun khirh tak atanga min chhan hram an tum a. Mihring lam hmuh danah chuan mitthi ang mai ka ni tawh a. Min tihnun leh tumin elctric-in min dep a, min chawi kang a, min dah thla leh thin a, electric hmanrua chuan min dep mawlh mawlh a. Darkar 48 zet engmah hre lova ka awm hnu chuan ka bengah hian hla mawi em em hi a lo ri vang vang a. ‘Thiltitheitu chu ka hria, A hming chu Isua a ni. Thinlung keh chhe vek tawh pawh a siam tha leh thei a ni,” tih hla hi a ni. Chu hla ka han hriat chuan chiang em emin ka harh a, mak tak maiin ka tho chhuak ta a. Chutia ka han thawh veleh chuan Pindan No 2-a min enkawltu chu ka han ko vat a, a lo luh chuan Phone min laksak turin ka ngen a, ka nupui ka biak ka duh thu ka hrilh a. “I thi tawh a ni lawm ni? Engtin nge min biak theih?” ti chungin a tawlh sawn dawrh a.

Hetiang thil ropui tak a thlen lai hian ka bul chiah mu chu a thi a. Ani dinhmun hi kei aiin a zia daih zawk a, mahse a thihpui ta a ni. Ka nupui nena kan awm dun lai chuan a fapa chu kan bulah a lo kal a, ka dinhmun a duhawm loh em em laia ka dam chhuak tlat chu a chhan min rawn zawt a. Ka nupui chuan Lalpa Isua Krista khawngaihna vang liau liau a nih thu a hrilh a, a Bible kawl lai chu a pe nghal bawk a. Chu tlangval chuan Bible chu a chhiar a, Isua chu a ring ve ta a. “Ka pa chu awm tawh lo mahse nangmah tidamtu van Pathian khi vawiin atang chuan chibai ka buk tawh dawn a ni,” a ti ta a. Ka chunga thil thleng zawng zawng hre vetu Delhi-a awm sipai Captain pakhat pawhin Isua a lo pawm ve ta bawk a ni.

Escorts Hospital-ah chawlhkar khat zet ka awm hnu chuan ka dinhmun en fiah leh turin Chief Cardiologist Dr Ashok Seth leh a thawhpui Dr Vijay Seth te chu va hmuh ka tum ta a. An pindanah min ko lut a, “Damdawi ina i rawn luh zan kha chu zan duhawm loh tak a ni. Nimahsela kan Lalpa leh Chhandamtu Isua Krista chu a tidamtu che a ni,” tiin min hrilh a. Lalpa Isua Krista thiltihtheihna ropui tak chu anni pawhin an hmu a, an pawm thlap a ni.

Pathian chuan a thiltihtheihnain min tidam leh a, nun bul min tantir leh a ni. Min tihdam leh chhan chu a rawngbawl tur te, amah chibai buk tur leh a hnathawh ropui tak puang turin a ni. A pawimawh berah chuan heng thil zawng zawng hi Pathian ropuina tura tih vek a lo ni. Ngawi reng ringawt lovin ka fak zel tawh ang a, ka thih ni thlengin Pathian hnathawh ropui tak hi ka puang zel dawn a ni.


(A ngaihnawm em avangin induh khawp lo tak chungin ka letling ve ringawt a nih hi - P.C.Vanlalrova)

Post a Comment

Powered by Blogger.