Lawngtlai May 17 : Mizoram sorkarin Total Lockdown a thawh hnihna a puan chu tukin zing atangin May 24 zing 4 thlengin hman a ni dawn a. Hemi atan hian Lawngtlai Veng hrang hrang VLTF ten an veng chhungah theuh sorkar ruahmanna zulzuiin ruahmanna an siam a. Sorkar lam atanga duty, Executive te pawh a thawh hnihna atan hian an inbuatsaih bawk. Hetih lai hian Police lam pawhin an mawhphurhna hlen zel tumin inbuatsaihna tha tak an nei bawk. Executive Duty lam hi duty mi thar an inthlak dawn a, duty post pakhat erawh a ngai angin an la kal ang.
Lawngtlaia bazar hmun veng pahnih Bazar veng leh Chandmary vengte chuan an veng chhunga bazar dan turah ruahmanna an siam a. Bazar vengah hian Bazar hun hawn ni, Thawhlehni leh Zirtawpni ah zîng dar 9:30 thleng Thlaihnah leh Thlairah zawrh phal a ni anga, tlai lamah dâr 3:00 atanga dâr 5:00 thleng an zuar leh thei ang a. Thawhlehni leh Zirtâwpni vêk hian Dâwr pangngai zing dâr 9:30 atanga tlailam dâr 3:00 thleng an hawng thei ang. Bazar na ah Two Wheeler bâk lirthei dang ken a rem lo a ni. Tin, Thawhtan Zân leh Ningâ zan a Dâwr bungrûa la tûrte'n, an vêng VLTF hriatpuina lehkha kengin, zân dar 7:00 atanga dâr 10:00 inkâr chhungin bungrûa an la thei ang.
Tin, Bazar vengah hian Vawk leh Bâwng bîk chu an zawrhna hmun pângngâi ah zuar lovin, anmahni in lamah talh a zawrh phal a ni a. Sangha leh Arsa chu an hmun pangngai ah Thawhlehni leh Zirtawpni zîng lam dar 9:30 thleng leh tlâi lamah dar 3:00 atanga dar 5:00 thleng an inpho thei ang.
Chandmary vengah chuan Thawhtanni leh Ningani zing dar 6:00am atangin dar 10:00am thleng Hardware dawr, Cement leh Rod dawr te inhawn phal a ni a, Thawhhlehni leh Zirtawpni zing dar 5:00am atanga dar 12:00n thleng Thlai, chawhmeh, Sa leh Paihte sumdawngte an inpho thei ang a. Hemi ni vek dar 12:00m atanga dar 5:00pm thlengin Eichawp dawr leh Ranchaw dawr te an inhawng thei bawk ang.
Heng bazar na veng hnihte hian Lawngtlai mipuite chu bazar hunah social distancing vawng tha a, facemask vuah theuh turin an ngen bawk a ni.
Post a Comment