Lawngtlai, 2nd May.2021 : Tlabuang khaw chhung bikah nimin chawhma dar 11 vela mi pakhat Covid-19 kai hmuhchhuah a nih atangin, vawiin tlai dar 5 thleng khan mi 169 endik atangin Covid 19 hri kai mi 36 hmuhchhuah a ni a.
Tlabung Tourist Lodge Cabin, Covid Care Centre-a hman lai bakah Building tharte CCC atan hawn nghal ni mahse, vawiinah mi 18 hmuhchhuah an nih leh avangin room pahnih chauh a ruak leh tawh a. Hetih lai hian Symptom nei leh kum upa lam te Lunglei Covid Care Centre, SIRD Pukpuiah suan an ni dawn a. Zanin hian Bus hmangin thiar chhuah an ni ang.
“Nimin khan Tlabung khua, Vai dawrkai pakhat chu Tlabung Damdawiin OPD ah inentirin, Doctor in a rinhlelh nghal avangin a tawpberah a en a. Covid-19 endik nghal niin a positive tih hmuhchhuah a ni.
Hetiang a nih avang hian a chenpui, thenawm leh dawr bul hnai a mi, a hnaihchilhte ko khawmin endik nghal a ni a. Nimin vek hian mi 18 te chu Covid-19 Positive an ni tih hmuhchhuah a ni. Vawiin lamah nimina hmuhchhuahte hnimhnaih mi engemawzah endik chhunzawm leh a ni a, vawiinah hian mi 18 bawk hmuhchhuah leh an ni. Nimin leh vawiinah hian mi 169 te endik niin, mi 36 te chu Positive tih finfiah an ni.
Tlabung SDO (C) Pu Lalsanglura hnen atanga Zonet JB in thu a dawn danin, Nimina vai dawrkai Covid-19 Positive an hmuhchhuah hi Nghathu zuar niin, a ni hian Borapansuri velah sumdawnna thilah a kal thin nia hriat a ni.
Tlabung VC member Hmingthansanga Ralte hnen atanga thu kan dawn danin, Tunah hian Tlabungah chhungkaw 30 chuang khunghran mek an ni a. Positive an pun hluai avangin Tracing ah mi engzat chiah nge tunah hian enfiah ngai tih sawi theih a ni lo tih a sawi.
Vawiin lamah Mizo Mutia pakhat Positive hmuhchhuah thar a awm avangin, a ni hian engzat nge hnuhma a neih dawn hriat theih a ni lo a ti a. Tun dinhmunah Tlabung khua chu kan him lo takzet a ni tiin, Zanin hian Tlabung VLTF te chuan chhungtinte zan dar 8 ah tawngtai turin a ngen tih a sawi bawk.
Tlabung Civil HospitalaMedical Officer Dr Lalthanpuia Sailo chuan kan zawhna chhangin, tunah hian Tlabungah Doctor pathum an awm mek a, Hetianga Covid-19 darh thut avang hian vawiinah Lunglei atangin Doctor pakhat an dah belh tih a sawi a, Hei bakah hian CCC a duty turin Trained Nurse leh Health Workers mi 13 vawiinah an inlak belh thu a sawi bawk. Dr Thanpuia chuan vawiinah pawh Contact Tracing team ten an chhinchhiahte an test seng lo tih sawiin, naktukah an chhunzawm leh dawn tih a sawi a. Engnge an hmalam hun tur a sawi theih loh niin a sawi bawk.
Tlabung damdawiina thawktute pawh tun dinhmunah hian mahni in lamah an haw tawh lo tih Dr Thanpuia chuan a sawi a. Mahniain luahte chu an la haw na a, chhungkuaa awmte chu mahni inah haw lovin, damdawiinah an in quarantine chilh vek tih a sawi a. Damdawiina thawkte chu High risk vek an nih tawh avangin chhungte kai hlauh vangin damdawiinah an inkulh vek tih a sawi bawk.
Dr Thanpuia chuan, nimina vai dawrkai an hmuhchhuah hi nizan khan Lungleia Covid Care Centre, Pukpuiah dah nghal a nih thu a sawi a. Tunah hian Symptom nei an awm nual avangin heng mite leh Kum upa lam deuh te, Zanin hian Bus hmangin Lunglei atangin a hruaitu tur Tlabungah an kal dawn tih a sawi.
Tunah hian Tlabung khuaah chuan mipui an ralti hle a, chhungtin kan him lo thei tih kan inhriat avangin thla a muang lo tlang hle a ni a ti.
Census record atangin Tlabung khuaah hian mi 4554 an awm a. Chhungkaw 976 vel awm anga tarlan a ni.
A va han pawi thin tak emm
ReplyDelete