Lawngtlai 29.05.2021 : Vawiin 29.05.2021 a Lawngtlai District leh District dang a thil thleng langsar zualte han tarlang leh dawn ila. Hri vei kan pung zel a, mipuite kan fimkhur chhoh zel ava ngai em. Face mask i vuah loh chuan ram leh hnam tan hmelma i ni ta reng mai le..
1. Mizoram chhungah COVID19 dona atan hun rei tak lockdown kalpui a nih hnuah hriin kiam lam a pan theih rih loh avangin Mizoram sawrkar chuan inkhuahkhirhna kalpui chhunzawm tha a ti a. Aizawl Municipal area leh District Headquarters ah te total lockdown kalpui chhunzawm a ni ang. Inkhuahkhirhna hman mek chu tlema tidanglamin ni 31.05.2021 zing dar 04:00 atanga ni 07.06.2021 zing dar 04:00 thlenga hman turin inkaihhruaina thar vawiin khan tihchhuah a ni.
2. Vawiin khan Lawngtlai East Bialtu MLA Pu H.Biakzauva chuan Lawngtlai khawpui chhung (a bial chhung) a VLTF te tlawhin an Veng chhunga mi harsa zualte tanpuina atan Rs 40,000 theuh a hlan a. Tin, VLTF te hman atan Rs 5,000 theuh a hlan bawk.
3. Tukin zing dar 4:00 vel khan Rev Lalhmingchhuanga Jongte, BCM Missionary leh Savun Kawrfual Ziaktu chu Delhi ah Covid-19 avangin a boral.
4. Pu H.Biakzauva, Lawngtlai East Bialtu MLA chuan Central YLA te Rs 20,000/- Covid-19 dona atan a hlan
5. Vawiin Ni 29.05.2021 hi Thalai Kristian Pawl-te Ramthim Ni a ni a. Thupui atan 'Thil tha ti atana siam' tih a ni. Covid-19 hri leng avangin Kohhran Thalai pawl ten hun an hmang thei lova, zanin dar 9:30 hian BCM You tube channel ah MTKP Secretary Rev K.Lalbiakenga'n Pathian thuchah a sawi ang a. TKP memberte an remchan angin tawngtai rual an nei ang.
6. Vawiin khan Thalai Kristian Pawl, Nazareth Unit Lawngtlai Council Veng te chuan District Hospital Lawngtlai Blood Bank a dah tur thisen Unit 22 an pe a. Thisen petu te hi mipa 15 leh hmeichhia 7 an ni.
7. Vawiin khan Mizoram hmun hrang hrang a Covid-19 vei mi 118 te chu enkawlna hmun atanga chhuah tir an ni Lawngtlai District ah mi paruk te chhuah tir zingah hian an tel bawk.
8.Mizoram puma ni 20.04.2021 atanga COVID-19 laka inven nana inkhuahkhirhna khauh zawka kalpui chu Lawngtlai khawpui chhungah pawh khauh taka kal chhohpui zel a ni a. Lawngtlai khawpui chhung veng 12-a COVID-19 Executive Duty-te chuan vawiin khan dan bawhchhia mi 4 manin, he'ng an mi mante hi pawisa ₹ 400/- chawitir an ni a. COVID-19 vanga inkhuahkhirhna kalpui chhung hian dan bawhchhia mi 746 man tawh niin, pawisa chawitir zat hi ₹ 91,900/- a tling tawh a ni.
9. Vawiin khan Dr.Lorrain Lalpekliana Chinzah, Chandmary Bialtu MDC chuan Bazar Veng VLTF te hnenah PPE set 3 a pe.
10. Hripui leng avangin school kal thei rih lo mahse, sikul naupangten mahni in lamah zirna an chhunzawm theih nan textbook sem thuai tum a ni a, vawiin khan zirlaibute hi District hrang hrangah phurh thlen a ni
Post a Comment