RAT AIAH RTPCR TEST TAM A NGAI, PRIVATE LAB LEH HOSPITAL HMAN TANGKAI A TUL
Heti chen hi lockdown kan kalpui tawh chunga case positive rate a la sang em em reng mai hi a mak khawp mai! April thla tawp lama Delhi lockdown a nih tirh khan sample test atanga positivity rate kha 36% a kai hman hial a, tukin (25/5)-ah khan 2.5%-ah a tlahniam thei a ni. Mizoramah hian RAT aiah RTPCR test hi tun aia kan hman nasat ve hi a hun tawh niin a lang.
RAT hian false result a pek chhuah hnem avangin RTPCR hman tam a ngai em em a ni. Miin symptom a nei niin a inhria a, RTPCR duh duha pan tur a awm loh avangin, private-ah RAT a va tih tir a, vei reng si kha vei lo anga result a lo chhuah si chuan a pawi thui thei lutuk. Nimin tlaiah pawh kan thianpa Lawngtlaia awm chu symptom a nei niin a inhria a, a khua erawh a la sik lo. Tukinah RAT a tih tir a, a negative tlat. RTPCR tih maina tur a remchang si lo.
Delhi-ah private lab-a RTPCR test man, kalchilhin cheng 800 a nia, an mahniin an panin cheng 1200 niin an sawi. Hetiangte hian ti ve thei ila, inringhlel te chuan an mahni sum sengin private an pan mai anga. Sorkar tan zangkhaina a thlen bawk ang.
Private hospital-te hi kan hnuhluh a hun hle tawh bawk. An duh phawt chuan hma pawh an la chak ang. India ram khawpui liana private damdawi in tam takin covid damlo an enkawl thei hlawm ang hian Mizoramah hian Private hospital te hi hmang tangkai ve ila. ZMC-a a thlawna inenkawl kher tul ti lo, private hospital a in enkawl duh zawk hi tam tak an awm dawn a, chu chuan sorkar phurrit pawh nasa takin a chhawk zangkhai ngei ang.
ZMC-a thawktu indaihlohna leh sum senso tam zia kan hria a, heng pawhpenna kawng chu sawrkar leh private damdawi in zawng zawngte hi covid 19 positive enkawl theihna tura ruahman hi a ni. Private lab kan neihte hi RTPCR lab din tir ve vat vat a hun tawh lutuk a, kan dinhmun enin kan inveng zo lo mai ang tih a hlauhawm ta!
Tukin Times of India front page te kha tam tak chuan in lo chhiar ve thoin ka ring a, North East hi Covid hotspot a nih maitheih thu a rawn tar kuau mai! Hmanhmawh takin tuna kan kalphung pangngai paiah lama kan pen vat vat hi kan himna tur a nih a rinawm.
-𝑽𝒂𝒏𝒏𝒆𝒊𝒉𝒕𝒉𝒂𝒏𝒈𝒂 𝑽𝒂𝒏𝒄𝒉𝒉𝒂𝒘𝒏𝒈
Post a Comment