NAUPANG LEH COVID 19
Nikum 2020ah Covid hripui kan tuar a .A reh mai dawn emaw kan tihlaiin kumin 2021 March thla vel atang a thawhhnihna 2nd wave kan tawng chho leh mek a.
Nikum lam chuan naupang vei an tam lutuk loh bakah naupang atanga puitling kaNi an awm meuh lo.Mahse kumin 2nd wave ah hi chuan naupang kai an tamin damdawi in dah ngai te pawh an awm ta nual mai. Naupang atanga puitling hrikai an pung ta bawk a ni.
Tuna 2nd wave hi chu kum in July thla chho ah chuan a reh deuh duak hman mithiam ten an ring.A chhan chu Puitling kum 18 chung lamah hridanna Covid Vaccine tam takin an lak vang a ni pakhat ngei ang.
Tichuan naupang kum 18 hnuai lam hi Covid Vaccine an lak ve loh avangin kai leh vei thei awmchhun(Age group) hlawm lian chu an ni ta mai a.Hei vang hian mi thenkhatin Covid 19 hi 3rd wave anga a lo thawk leh a nih chuan heng naupang ,kum 0-18 vaccine la ve lo hian an kai nasa ang tih an hlauthawng a. Covid 19, 3rd Wave hi a rawn thleng ngei dawn tih hi chu mi thenkhat rinthu a la ni rih e.
NU LEH PA HRIATTUR:
1.Naupang hian puitling leh kum upa lam aiin Covid 19 hripui do letna an taksa hian an nei tha zawk.
2. Hri an kai pawhin an la na lutuk lo.Hritlang,khawsik, pumna ,kawthalo etc an nei thei.Nazual leh thihpui an awm ve thei. USA Covid 19 tamna ber an zirchianna 13.5.21 a an tar lan danin hrikai 14% vel hi naupang an ni.Chung zinga naupang Damdawi in luh ngai chu 0.1-1.9% an ni a.Thihpui chu 0.00-0.21% an ni.(source Covid 19 US state Data report 13th.May 21)
3. Naupang chu chaw tha leh vitamins hrang 2 Vit D,C ,B leh Zinc lo pek hian natna venna an neih that phah thin.
4.Naupang hi compound velah infiam tam tir tur.Ke a kal tamtir te hi a tha em em a ni.
5.Pawn an chhuahin kum hnih chung lam chu face mask vuahtir ngei tur.Nausen chu an thawk a tihbuai theih avangin vuahtir loh mai tur.
6.Kut sil zin a pawimawh a, sahbawn emaw,hand sanitiser a tihfai sak fo tur.
7.Social Distancing .Pawn mipui awmna a hruai chhuah loh a him ber.
8.Hridanna Vaccine:
India Company Bharath Biotech hian naupang kum 2-18 inkar tan Covid Vaccine tunah enchhinna clinical trial phase 2 leh 3 an kalpui dawn mek a.Nakin lawkah Naupang Vaccine hi kan nei thuai turah beisei ang u.
Nu leh pa zawng zawng te fimkhur tlang ila. Covid 19 ,phase 3 hi lo hlauh lawk vak loh a tha ang.Kan theih tawp theuhin mahni fate fimkhur leh zualin enkawl theuh ang u.
Dr.Lalbiak kima (Adviser)
&
Dr.Lalchhuankimi,
President,
Indian Academy of Pediatrics
Mizoram State Branch.
20.5.2021
Post a Comment