Miss Universe 2021 ah Zohnahthlak thuam (Lai Dress)

-Amos MS.Dawngzuala

Lawngtlai 14.05.2021 : Miss Universe vawi 69-na thlanna Florida khawpui Miami a neih mek kalzel ah, tukin zing May 14, India Sana a dar 5:30 Am a National Costume Show neih zawh takah khan Miss Myanmar Thuzar Wint Lwin chuan Lai thuam famkim inbelin a inlan.

Miss Myanmar Thuzar hi an ram Miss Mynamar thlanaah khan Hakha, Chin State aiawh tu niin an ram a National Costume Competition ah pawh he Lai Thuam mawi tak hi a lo inbel tawh a, Miss Universe ah erawh hi chuan Myanmar pumpui hnam nunphung tarlang thei hak tum mahse a suitcase hi airport lam chian loh vangin a tangkhang a, chu vangin Atlanta, Georgia a Chin Community te’n he thuam hi National Costume Show-a a hak atan an rawn pe a ni.


Thuzar Wint Lwin hi Zonu chhulchhuak niin Rangoon khawpui ah a seilian a, tuna a thuam inbel hi Miss Mizoram 2020 thlanna ah pawh khan Miss Mizoram Lawngtlai B.Lalthuthlungthari pawhin a lo inbel ve tawh bawk a ni.

Thuzar Wint Lwin hak atana Miss Myanmar lamin an buatsaih diktak hi Pyit-Tine-Htoung tih a ni a, hei hi notelem niin Mizo tawng chuan “vawm hnuah pawh a la ding reng” tihna a ni a, hetiang notelem hi eng tiang pawhin sawp mah ila, a dik zawngin a ding leh zel a, chumi chuan tuna Myanmar mipui te’n harsatna an tawh mek hi tarlangin, eng ang harsatna pawh tawk se an ding leh zel dawn a ni tih lantirna tur a ni.


Rawlkhawlhna an tawk hi a pawi viau nachungin, hetiang a Lai thuam mawi tak khawvel a Miss thlanna pui ber a kan hmuh phah erawh Zofa te tan chuan ropuiin a chhinchhiah tlak em em a ni.

Post a Comment

Powered by Blogger.