Lawngtlai 15.05.2021 : Pu Manghmunga Chinzah, CEM, Lai Autonomous District kaihhruai LADC sorkarin May 12 a Covid-19 do nana an thurelte chu chak taka bawhzui mek a ni. LADC hnuaia hnathawkte nikhat hlawh dil leh MDC te ni hnih hlawh dil nise an tih chu tunah hian tihpuitlin ṭep a ni tawh.
Tin, Lawngtlai District chhunga Lab. Technician indaihlohna avanga Lab. Technician pathum rawih nise tia thutlukna an siam chu Chief Medical Officer, Lawngtlai kutah dah a ni a, tunah hian C. Lianchhingpuii D/o C. Lalzuala, Electric Veng, Lawngtlai chu lak a ni tawh a. Lab. Technician-te hi thla thum chhhung atan an hlawh hi LADC hian a tum dawn a ni.
Hri leng dona atana pawimawh ber mai Vaccine pek chu LADC sorkar chuan a ngai pawimawh hle a, a hma thei ang bera LADC huam chhunga vaccine pek zawh a nih theih nan Medical Team te kalna tur motor leh driver te chu LADC chuan a tumsak dawn a ni.
Rauthla zawhna chhangin, LADC in Covid-19 dona kawnga mawhphurtua a ruat LADC a DM&R Officer Pu Thathluna Chinzah chuan, meeting zawh aṭang khan chak taka hmalak nghal a ni a, nikum lama CEM Relief Fund for Covid-19 aṭanga hman bang nuai 4 vel la awm hian bul kan ṭan phawt ang a, sorkar hnathawk hlawh leh MDC te hlawh lo lut hmang hian hnathawh leh tum a ni a ti a. Vaccine pek hi kan ngaih pawimawh hmasak a nih avangin hei hi hna hmasaah kan nei ang a ti a. VLTF te pawh a theih anga ṭanpuina pe turin ruahmanna siam a ni a ti bawk. Thawhṭanni hian LADC ruahmannain tuithlang lamah vaccine pe turin medical team te an kal dawn bawk a ni.
Post a Comment