I HLU BER MAI LAL ISU - Biakthansanga Khiangte

 I HLU BER MAI LAL ISU

-Biakthansanga khiangte

American zaithiam leh lemchan thiam Whitney Houston-i  tluk a zaithiam hlawhtling hi an tam lovang. A zai record copy maktaduai 200 zet a hralh a, hmeichhe zinga record hralh tam ber a ni. Whitney hi a naupan lai chuan kohhran bel tlat thin a ni a. Kum 11 a nihin New Hope Baptist Church, New Jersey-a Junior Gospel Choir ah soloist a ni a. Hlim leh nuam ti takin, kohhran huang chhungah rawng a bawl thin a.

Mahse,  a han tleirawl chho va biak in a hlat hret hret a, a hla sak thin pawh a dang ta tial tial a. Zai,  lemchan leh model lamah a in hmang chho va, namen lovin a hlawhtling a, englai pawh a ven ngai hial khawp in a lar ta a. Pawisa hman sen loh  a neih hnu chuan ruihtheih thil nen nasa takin khawvel a chen ta a. Mahse, chung chuan a nun tuihal a ti reh lovin, a beisei angin hlimna tak tak a tawng tlat lo. Hlimpui a hnekin, a tuihal a ti zual zawk emaw tih mai tur a ni. Zaithiam lalnu tih hial khawp a lar leh hausa ni mah sela, Feb.11.2012 ah Beverly Hills Hotel, California, USA ah tu ma dawm hlum lovin, drugs over dose in thi a chhar a ni.

Isua Kraws aia khawvel thlangtu te hian an tifuh ngai lo a. Khawvel ropuina aia Isua rawngbawl thlang tu te erawh an inchhir ngai thung lo a ni. India rama hnasang  leh zahawm ber a ngaih IAS hna bansan a, Pathian rawngbawl tura inpe, Mizo IAS hmasa ber Rev C.L Rema (1925-2016) kha IAS hna bansan a, Pathian rawngbawl a thlang kha a inchhir leh in chhir loh ka zawh chuan, a inchhir loh thu in min chhang a ni. Krista tel lova hausak te, Isua tel lova lar te chuan hlimna tak tak a pe thei lovin, lungngaihna leh beidawnna mai a thlen zawk a ni. 

Tunhnai ah khawthlang _media_ luah tam em em tu chu, khawvel a pa hausa ber nihna kum  engemaw zat lo hauh tawh tu Microsoft Chairman thin Bill Gates leh a nupui Melinda te inthen chung chang a ni. Mi beisei loh takin  kum 27 lai an inneih hnuin an in then tlat mai a. Sum leh pai, hausakna chuan an nupa kar a khi chu a tuam dam zo ngang lo a ni.

Isua tel lova hausakna chuan hlimna leh lungawina tak tak a pe thei lo. Isua'n lalna leh thu neihna a chan lohna chhungkua chu, an in chhawng a san poh leh lungngaia an tahna a sang ting mai a ni!!

Isua neitu, khawvel aia Kraws thlangtute chu mi rethei te pawh ni sela, beiseina nung an neih avangin harsatna karah pawh an nun a hlim thin. Isua hi a va hlu em. *Mimal leh chhungkua a neih tlak, thlan tlak a va ni chiang em..

-