WHITE FUNGUS AN TI LEH TA
Black Fungus an ti a, kan hlau hle a, state thenkhatah chuan hri leng angin an puang tawh, chutih lai chuan a aia hlauhawm zawk White Fungus infection pawh hriat tur a awm ve leh ta tlat mai. White Fungus infection hi Patna, Bihar-ah case pali vel hmuh a ni tawh a, mithiamte chuan case dang pawh hriat chhuah loh a awm ngei an ring.
White Fungus hi Black Fungus ai pawhin a hlauhawm zawk niin an sawi a, a symptom pawh a tam zawk a, Black Fungus infection chu hmelhmaiah hmuh theihin a rawn lang chhuak a, White Fungus erawh HRTC, chest scan te tih loh chuan hriat chhuah mai theih a ni lo niin an sawi ve thung.
Black Fungus leh White Fungus hi fungus infection, mucormycetes an tih maiin a thlen ve ve a ni a, heng fungi te hi kan chhehvelah an awm. Hetiang natna hi inkai chhawn awlsam chi a ni lo nia an sawi rualin, damlo ten an hip lut mai thei a, taksa peng pawimawh te khawihin harsatna a thlen thei a ni. Hriattur pawimawh chu taksain natna a do theihna (immune system) chak lo ten heng fungus-te hi hnawng, tui leh kan chheh vel hmun thianghlim lo leh tawphnawk atangin an kai awlsam.
Black Fungus aia White Fungus a hlauhawm zawkna chhan chu taksa peng pawimawh-ah a darh thei a, thluak, thawkna, chaw paitawih lam hnathawktu (digestive tract), kal (kidney) leh serh bawr (private parts) thlengin a khawih thei.
Infection dang ang bawkin White Fungus hian immune system chak lo te a bei nasa ber a, zunthlum, cancer leh natna benvawn dang steroid hman ngai te tan pawh he fungus infection hi kai a awlsam bik a, report thenkhatah chuan hmeichhia leh naupang tan kai a awlsam niin an tarlang bawk.
Doctor-te chuan Black Fungus ang bawkin White Fungus hi thil tawp hnawk leh thianghlim lo khawih atanga kai theih niin an sawi a, a bik takin damlo, oxygen hmanga rei deuh tak enkawl tawh, an tui hman thinghlim tawk lo ten an kai awlsam hle bawk. Heng avang te pawh hi a ni ang White Fungus infection hi COVID damlo, damdawi ina enkawl lai zingah a tam ve leh ta riau a ni. Entir nan, humidifier leh oxygen cylinder atana tui thianghlim tawk lo hman te hian damlo-ah White Fungus symptom a neih tir thei a ni.
White Fungus infection-ah hian a symptom langsar deuh chu COVID-19 symptom ang deuh tho a ni a, mahse, COVID-19 test result erawh an negative duh hle. Mithiamte chuan X-ray emaw chest scan emaw chu he natna hmuhchhuah theihna tha ber niin an sawi. A symptom-ah hian Black Fungus symptom ang deuh te pawh a tel thei bawk.
White Fungus chungchangah hian hriat fiah loh a la tam a, doctor tam zawk chuan awmbawr leh chuap a khawih thei niin an ngai a, hei vang hian a symptom-ah khuh, awmbawr na leh thawk lama harsatna te pawh a tel niin an sawi a, vûng, luna reh tha thei lo leh taksa na te pawh a thlen thei.
Report-a a lan dan chuan White Fungus kai te hi antifungal damdawi hmanga enkawlin tha takin an dam leh thei niin an tarlang a, tunah chuan fungal infection enkawlna damdawi chauh hi a enkawlna damdawia hriat a la ni rih.
(White Fungus chungchang hi Times of India atanga lak chhawn a ni.)
Post a Comment